November 7-a MLA inthlanpui neih huna polling party-a tel tur te thliarfel hna thawhkhatna chu district hrang hrangah tan a ni tawh hlawm a. Thawhtanni khan Khawzawl leh Saitualah neih a ni.
Khawzawl district election officer K Lalrohlua hoin polling party 1st randomisation hi neih a ni a. He district-ah hian Tuichang Assembly bial awmin, polling station 28 a awm a; reserve-a awmte nen presiding officer (PRO) 35, assistant PRO (APRO) 35 leh polling officer 70 an awm. Hmeichhia vekin an vil tur ‘Pink Polling Station’ pathum – Khawzawl Kawnzar, Arro leh Zuchhip bakah thalai hlangin an vil tur ‘All Youth Manage Polling Station’ pakhat – Khawhai-I a awm dawn a ni. 1st randomisation-ah hian Pink Polling Station leh All Youth Manage Polling Station tih loh polling station 24-a duty tur computer hmanga thlanchhuah (randomise) a ni.
Saitualah pawh district election officer Dr Lalngura Tlau kaihruaiin polling party 1st randomisation an nei a. Inithlan langtlang taka kalpui chu an thil tum ber a nih avangin first randomisation-ah hian a tlangpuiin political party-te sawm thin ni lo mah se, tun tumah chuan party-te sawm an ni tih a sawi.
October 14 khan Lungleiah district election officer Ramdinliani hoin neih a lo ni tawh bawk a. Lunglei district-ah hian Assembly bial 7 awmin, presiding officer (PRO) 197 + reserved 16 nen a vaiin 213, assistant PRO (APRO) 213 (197+ 16), polling officer -416 (394+32), an vaiin 852 (788+64) an ni a. Hmeichhia vekin an vil tur Pink Polling Station 12 a awm a ni.
Randomisation hi tum thum neih tur niin 2nd randomisation hi general observer hoa neih tur a ni a, a vawi thumna leh a hnuhnung ber hi vote thlak ni (poll day) atang chhiarleta ni thum hmaa neih leh tur a ni.
Polling party tur thlirfel tan
