Porto captain hlui Costa a thi thut!

Porto captain hlui Costa a thi thut!
FC Porto captain hlui Jorge Costa chu Porto training centre-a hna a thawh laiin nikhaw hre loin a tlu thut a, kum 53 mi lek niin lungphu chawlin a thi zui ta a ni.
Indian Super League club Mumbai City FC manager hlui Costa hian defender ni chungin blue and white Porto shirt a hak lai khan goal 20 a thun tling a; kum 2004 khan khatih laia an manager Jose Mourinho hnuaiah defender la ni chungin Costa hian Portuguese club chu Champions League trophy a lakpui a; Portugal tan pawh game 50 a khel tling.
Costa hian football a khelh laiin season khat chhung chu loan-in Charlton tan Premier League-ah kum 2001-02 chhung khan a khel ve zuai tawh a, kum 2006-ah inkhelh a chawlhsan.
He centre-back hian management lam luhchilh nghalin, season liamtaa a club hlui Porto-in director of professional football atana an sengluh thleng khan club hrang hrang 16-ah coaching hna a thawk hman.
Jorge Costa thihna hi tun nipui thawt chhunga FC Porto player hlui pathum thihna ni der tawhin, he club loanee lo ni tawh Diogo Jota leh a unaupa Andre Silva-te July thla khan car accident-ah an lo thi tawh a; Silva zawk kha Porto lama kum ruk zet lo khawsa tawh a ni.
Kum 2002 leh 2004 chhunga Porto a enkawl laia Costa pu ni thin, tuna Fenerbahce boss ni mek Jose Mourinho chuan nimin Champions League third-round match pakhata Feyenoord an hmachhawn tur pual news conference-ah a captain hlui thihna chungchang hnukulh teuhin a sawisawk a:
“Tunah hian ka hnenah thu la sawi thei ni se he press conference hi hmachhawn ngei tur leh naktuk kan game khelh tur pawh khela hnehna chang ngei turin min hrilh ngei ang a. ‘kei chu min htiehnghilh hmiah rawh u’ tiin a thihna ngaihtuah loa kan game khelh tur lama insawrbing turin min fuih zawk ang.
“Chuvangin, vawiin leh naktuk hian ka ka hna thawh ka tum dawn a, chu mi zawhah ka tap chauh ang,” tiin a player hlui thihnain delh rit hle mah se professional a nih anga a mawhphurhna hlenchhuah ngei a tum thu leh chu chu Costa duhdan pawh a nih ngei a rin ngheh tlat thu a sawi.
Jorge Costa hi Porto academy atanga inzir chhuak niin, ei a tlin hnuah amah siamtu club tan match 324 a khelhsak tling a; kum 2005-a a chhuahsan thleng khan trophy 24 lakpui tlingin, chu’ng zingah chuan Champions League leh Uefa Cup pakhat ve ve bakah Primeira Liga title pariat a tel.
Uefa Champions League title an lak tuma an player pawimawh pakhat Deco pawhin Instagram lamah Costa sunna tawngkam chhakchhuakin, Portuguese tawnga ‘Bicho’ tia hminglema an koh dan lam ri chungin an sun mek chu ‘legendary captain’ tiin a sawi a, “Vawiin hian Portuguese football leh FC Porto chuan an chhinchhiahna ropuiberte zinga pakhat kan chan ta a ni.
“Jorge Costa hi Porto thlarau phuarkhawmtu a ni a, Porto tumruhna siamsaktu a ni bawk. Kan zavaia min fuihthar thintu legendary captain a ni.
“Ani nena title tam tak leh hlimna kan intawm thei kha ka tan chuan chawimawina a ni a, i hming hian hriatreng a hlawh tawh ang. Khawhar chhungte zawng zawng ka tuarpui a; nang pawh, Bicho, thinlaiah i cham ren tawh ang,” tiin thlahna lungkuai tak a hnutchhiah.
Costa team-mate dang Pepe pawh a ngawi mai mai thei bik lo a, thlahna leh tawrhpuina tawngkam hriat nuam tak a chhak chhuak ve bawk.
Kum 2000 khan Costa hian Portuguese Golden Ball dawngin, defender ni chungin Portuguese league best player chawimawina hlan a ni.
Porto coach Octavio Machado nena an thu a inhmuh tak loh avangin kum 2001 khan Costa hian loan-in Charlton a zawm a, Addicks tan khan game 26 a khel tling.
Charlton boss hlui Alan Curbishley chuan a lo hrual ve zawk tawh Costa chungchang sawiin, a theihna avanga mi zawng zawng zahkai leh mihring mihrinna zawna pa duhawm pui mai a nih thu a sawi.
Costa hian Braga-ah a managerial career tanin, coaching a luhchilh tanna club pawh chuan X kaltlangin sunna thuziak an tarchhuak ve bawk.
Portugal rama Braga, Olhanense leh Academica tihte a enkawl bakah, Costa hian Romania, Cyprus, Tunisia, India leh Gabon ramah team hrang hrang a lo kaihruai tawh bawk a ni.