Portugal Euro team-ah veteran pahnih
Kum 39 mi ni tawh forward Cristiano Ronaldo chu thla thar maia Germany rama khelh tur European Championship-a inlan turin Portugal squad-ah telh a ni a, Euro Championship-a vawiruk a inlanna tur a ni tawh!
Thawhlwhnia coach Roberto Martinez-a 26-man squad tarchhuahah veteran defender Pepe pawhin hmun a la chang ve bawk.
Euro vawiruk a hmachhawn tawha tournament tina goal la khung fai vek Ronaldo hian kum 2004 khan a vawikhatna atan Europe ram mipa team-te football-a inelna sangberah a khel tan a, a hnuhnung ber Euro 2020-ah khan goal nga thun lehin top scorer lawmman golden boot a la dawng zak zak a; belhkhawmin Euro bikah hian goal 14 a khawl tling tawh.
Nikum khan European qualifying match a khelhho atangin goal 10 a la puitlin bawk a, kumin Germany ram tournament-ah pawh hian player ngaihven hlawh ber turte zinga mi a ni leh nghal.
Club lamah pawh Ronaldo hian a vanglai a la hmang mek emaw tih mai turin Saudi Pro League club Al-Nassr tan inelna hrang hrangah goal 42 thun tling tawhin, assist tum 13 a siamchhuak tling tawh bawk.
Kumin Euro hi Cristiano Ronaldo tan major international tournament 11 a khelh tlinna tur ni tawhin, Al-Nassr forward hian a daih rei bawk a, international football history-a game khel hnem ber niin, Portugal tana match 206 a khelh tawh atangin goal 128 a thun tling tawh a ni.
Portugal boss Roberto Martinez chuan forward pasarih a thlan zinga Ronaldo a la telh chhan news conference-ah sawiin, goal bula a quality la pangngai reng chu hmuhhmaih theih a nih loh thu leh chu tak chu an team-in an la mamawh ngawih ngawih chhan a nih thu a sawi a, hliamin a bawhbuai zen zen loh a captain chu taksa lamah pawh duhthusamin a la fit tha tih a lang niin a sawi.
Europe ramte inelnaa a inlan vawikhatna Euro 2004 kha an ramin a thlen kum niin, a tournament debut-ah a ram a champion-pui nghal teuh hle a, final-ah rin loh takin Greece an ngam ta lo a nih kha!
Ballon d’Or chawimawina vawinga tehreng dawng tling tawh Ronaldo hian World Cup-ah a ram la champion-pui zo lo mah se international level-ah major silverware pakhat chu a sualchhuahpui ve tawh a, chu chu Euro 2016-a an champion kha niin, Nations League (2018-19) lamah a ho hian Portugal an lo champion tawh bawk.
Germany ram tournament khel tur Portugal squad-ah hian Ronaldo hi player upa ber a ni dawn lo a, Martinez-a kohna dawng veteran player dang kum 41 zeta upa ni tawh Porto defender Pepe chu player upa ber a ni dawn.
Pepe hi kum 40 ral kai tawh ni mah se kuminah ngei pawh Porto team-a an player pawimawh a la ni pha fan a, a club tan game 38 khel tling tawhin, Champions League last 16 an luhna kawngah a la thawhhlawk a, tualchung league lamah Sporting leh Benfica pha loin a team chu pathumna nihpui mah se Cup final a thlenpui.
Chuti taka player hlu leh fei, tawnhriat ngah bawk si Pepe a la thlan chhan sawiin Martinez chuan, “Dressing room-a Pepe mawhphurhna hi a pawimawh a, national team shirt a hak laia a khelh dan leh nungchang hi entawntlak a ni bawk.
“Kumin March thla khan Pepe hian ram tan match hnih khelin, minute 90 chhung a inlanah team-in goal kan chhuah lo.
“Midang dawr dan a thiam a, a dinna a hrechiang a, a fit that phawt chuan tun tournament kan hmachhawn mekah pawh hian player pawimawh lutuk a la ni dawn,” a ti.
Pepe Porto team-mate kum 21 mi Francisco Conceicao pawh Germany rama inkhel tur zinga thlan a ni.
Winger Conceicao hi ex-Portugal international Sergio fapa niin, kumin March thlaa Slovenia an hmachhawn tum khan an ram senior team tan a inlan tan a, tunah Euro khel turin hmun a chang zui ta a ni.
Portugal head coach hian squad-ah Premier League player pakua ngawt senglutin, chu’ngte chu Ruben Dias, Diogo Dalot, Bruno Fernandes, Bernardo Silva, Joao Palhinha leh Diogo Jota bakah Wolves trio Jose Sa, Nelson Semedo leh Pedro Neto niin, Goncalo Inacio chauh chu an ram club lian Sporting player atanga koh awmchhun a ni!
Portugal hian June ni 18 Group F bul an tanna turah Czech Republic tumin, a hnu lam group match dangah Turkey leh Georgia an su zui leh ang.
Portugal Euro squad
Goalkeepers: Diogo Costa (Porto), Jose Sa (Wolverhampton Wanderers), Rui Patricio (AS Roma)
Defenders: Antonio Silva (Benfica), Danilo Pereira (Paris St Germain), Diogo Dalot (Manchester United), Goncalo Inacio (Sporting), Joao Cancelo (Barcelona), Nelson Semedo (Wolves), Nuno Mendes (PSG), Pepe (Porto), Ruben Dias (Manchester City)
Midfielders: Bruno Fernandes (Manchester United), Joao Neves (Benfica), Joao Palhinha (Fulham), Otavio Monteiro (Al Nassr), Ruben Neves (Al-Hilal), Vitinha (PSG)
Forwards: Bernardo Silva (Manchester City), Cristiano Ronaldo (Al Nassr), Diogo Jota (Liverpool), Francisco Conceicao (Porto), Goncalo Ramos (PSG), Joao Felix (Barcelona), Pedro Neto (Wolves), Rafael Leao (AC Milan).