- H&FW department
Post inhauhsak a theih loh
- H&FW department
Health & Family Welfare department hnuaia health worker post 100 direct recruitment-a lak turah a nghet loa lo thawk tawh sa tan post inhauhsak theih a ni loa, danin a remti lo tih an sawi.
Health & FW department thuchhuak chuan, Mizoram Contract Health Workers Association (NHM) (centrally sponsored scheme) chuan health worker 100 lak tur zinga post 50 chu an tana hauh ngiatin Chief Minister Office kawtah Nilaini khan pungkhawmin thuchhuah an siam bawk tih a sawi.
‘Health Worker Recruitment Rules 2011 (as amended 2024) sawi angin, health worker post ruak hi 100% direct recruitment-a hnawh khah tur a ni a, health worker lakna tur hi open advertisement kaltlangin direct recruitment chauha kalpui tur a ni. A dil thei/ qualify apiang examination leh personal interview-a ti thate lak tur a ni,’ a ti.
The Mizoram Direct Recruitment (Conduct of Examination) Guidelines 2018, DP&AR hriattirna tihchhuah dinglai angin, sawrkar hna eng pawh direct recruitment-a hnawhkhah tur chu written exam leh personal interview kaltlanga tih tur a ni, tiin, contract health workers tan The Government of Mizoram Regularization of CSS Employees Scheme 2024 a awm a. Chu dan hmang chuan a tling (eligible) chu regularize theih an ni tih a sawi a ni.
Sawrkar hna lak chungchangah a bika induhsakna neih chu India danpui Article 14 & 16 kalh a nih avangin tute emaw induhsak bik hi a remchang lo a. Hei vang hian Mizoram Contract Health Workers Association (NHM) tana reservation pek chu a remchang lo, tih a sawi a ni.