CRPF te kah hlum Zofate ruang lak chhuah theih a la ni lo a, post mortem tih zawh hnuah pawh damdawi in lamin an la kawl.
November ni 11-a Jiribam district, Manipur-a CRPF te kah hlum mi 10-te ruang hi Silchar-ah lak a ni a, Silchar Medical College-ah post mortem tih a ni. November ni 14 tlaiah khan zawh fel a ni a, mahse a tuk tlai thlengin ruang hi lak chhuah theih a la ni lo.
Medical College-ah hian Silchar leh a chhehvela Zofate’n an thut chilh a, Manipur sorkarin ruang hi a la ang tih an hlauh avangin Thawhlehni atang khan chhun zan zawmin an thut chilh a ni.
Ningani tlaiah khan post mortem hi zawh fel a ni a, ruang lo changtu Zo hnahthlakte’n lak chhuaha Mizoram lama kalpui an duh laiin thuneitu lamin an remti lo. Ruangte hi Silchar Medical College-a ruang dahna inah dah a ni a, Zo hnahthlakte bakah Manipur Police te’n an thut chilh mek.
Barak district thuneitute’n tihngaihna an hriat loh thu leh an huam chhungah post mortem tih a ni tih bak chu sawi tur an neih loh thu, an buaina an hriat loh thu te an sawi a, SP pawh a hmunah hian a kal thin.
Thu dawn danin, Zo hnahthlak lam hian Assam chief minister be thei tur an ngaihtuah a, Halflong-ah Assam chief minister nena inhnimhnai thin a awm thu te, ani’n a be thei ang em tih an ngaihtuah a, kal zel dan tur an hre rih lo. Ningani zan, post mortem tih zawhah khan an lungawi loh thu sawiin an au rual a, chumi hnuah a hmuna inawm chhawk dan tur an rel zui a ni.
Ni 12 zanah khan post mortem hi an tan a, ruang paruk an zawhin a tuka chhunzawm tura an chawlhsan laiin Manipur sorkarin ruang hi thlawhna/helicopter hmanga Manipur-a laka post mortem pawh Manipur-a tih tur a tih thut avangin a tukah post mortem pawh tih zui a ni lo.
A hmuna awm Manipur Police te’n ruang hi lak an tum a, Nilaini atang khan Zo hnahthlakte nen hian an innawr tawh. Nilaini khan Manipur Police pakhatin silai a kau a, hei hian boruak a tisa nghal phat bawk.
A hmuna awm Zo hnahthlakte’n Manipur sorkar thil tum hi an remti lo a, Mizoram lama kalpui ngei an duh. Manipur sorkarin thu dang an nei leh a, ruangte hi an DNA lak tur an tih bakah dan lova Manipur-a pem lutah an puh tih thu dawn a ni.
Chutiang karah chuan Ningani chawhnu lamah khan post mortem tih chhunzawm a ni a, mahse an zawh fel hnuah pawh thu thar a awm thei rih lo.
Post mortem zawh hnuah ruang la thei lo
