Power-a intodelh tumnaah
kan style-in kan khel ang
– Power minister
Kawlphetha tha nei tur leh intodelh tumnaah a kotlang ‘A’ Team thua awm tur an ni loa, field chhunga awm zawk an nih angin an ‘style’ a khel tur an ni tih Power minister F Rodingliana chuan a sawi.
Power & Electricity minister chuan tunhnaia power lama hmalakna a sawinaah, power supply a khaihlak deuh a, opposition lam an han au deuh a, tak tak emaw ti tawk an awm thin niin a sawi. “Tih chhiat kan la nei hman loa, tih that chhun tlem chauh a ni kan la neih. Opposition hi chuan min sawisel hi an tih tur a ni a. Field chhunga awm zawk kan ni a, pawnlam A-team thu thua awm tur kan ni loa, kan style-in kan khel tur a ni,” a ti.
An sawrkar hnu ah electric current thim zing viau anga sawi chu, P&E department chhinchhiah danah chuan kum 2022- 2023 chhungin quarter khat (thla 3 chhung) zela chhutin minute 5 aia rei current khaihlak hi vawi 4793 a awm a, a rei zawng hi minute 95029 anga chhut a ni. Kum 2023- 2024 chhungin vawi 3725, a rei zawng minute 142661 anga chhutin, tun sawrkar kum kal laia 1st quarter ah vawi 3199 power khaihlak a awm a, a rei zawng chu minute 145478 anga chhut a ni tih a sawi. Hetah hianin hmasawnna hnathawh, ABC kaih avangin vawiin 918 power shutdown lak a ni a, hemi tello phei chuan vawi 2281 (minute 130433) chauh power-a khaihlak a awm tih a sawi a ni.
Tunah hian central scheme RDSS atangin Aizawl khawpui chhung bikah ABC cable km.575 a sei thlak tura ruahmanna kalpui a ni a, km. 205.778 thlun tawh niin, thlun hmabak km. 369.22 a la awm tih a sawi a. Heng avang hian load shedding siam zeuh zeuh a ngai a, mipuiin an hriatthiam a ngai dawn tih a sawi.
Hei bakah hian Aizawl Smart City Project hnuaiah multiple utility pole (ban) 1007 thlak tura ruahman a ni a, zawh tep a ni tawh tih F Rodingliana hian a sawi. Aizawl khawpui chhunga hrui hnawk lutuk chu heng banah hian felfai taka zam tur a ni a, km. 8 vel thlak a ni tawh a, a bak km.2 la awm chu zawh thuai tuma chak taka hma lak a ni tih a sawi bawk.
Hydel project bawhzui bik pali a awm tih Power minister hian a sawi a. Sawrkar hmasa in lo hlamchhiah tawh mah se, DPR ngai rin theih a nih angin Tuirini chu bawhzui hmasakah an nei tih a sawi. Mizoram sawrkarin EAP (externally aided project) atan a thunsak a, sawrkar laipuia bawhzuiin kumin October 10 khan EAP portal-ah thun a ni tawh a. Ministry hrang hranga bawhzui a nih tawh hnuah zirchian that leh tura tih a ni a, hun reilote chhunga peih a beisei a ni tih a sawi. Funding tur pawh biakfel an ni tawh tih a sawi a ni.
Heng bakah hian Mw 180 pe thei tura duan Tuivai pawh thui tak hma lak tawh niin, Tlawng & Tuichang buaipui mek a ni a; Tuichang lui, Vankal bul Pi Luiah pump storage siam turin department chuan hydel project siam theihna a hmuchhuak thar a, a bawhzui mek tih a sawi.
Power-a intodelh tumnaah kan style-in kan khel ang – Power minister
