Power bill pek dan thar hmang tan Tranformer lei belh kan tum mek – P&E minister

Power bill pek dan thar hmang tan
Tranformer lei belh kan tum mek
– P&E minister
Mizoram khawi hmun atang pawha online-a electric bill pek theihna tur billing software thar chu August 1 atang khan hman tan a ni a. Zirtawpnia he system thar tlangzarhtute Power & Electricity minister F Rodingliana chuan tranformer chhia leh hlui thlakna tur a thar lei belh tum mek a ni tih a sawi.
Power & Electricity department chuan UGO electric billing software thar an tlangzarh rual hian revenue drive khar nghalin revenue collection lama Division tithate hnenah lawmman an sem a ni.
UGO electric billing system software hi Inventive Solution kutchhuak a ni a. Kumin March khan pilot project atan Rural Sub-Division leh Distribution Sub-Division-III ah hman chhin niin, May atang khan district headquarters hrang hrangah hman a ni leh a, August 1 atang khan Mizoram pumah hman tan a ni. Tun hi billing software/ system chi khat Mizoram puma hman vawikhatna a ni a. He billing system hi cloud base niin mobile android leh IOS application hmangin Mizoram khawi hmun atang pawhin online hmanga bill pek theih a ni.
P&E minister F Rodingliana chuan tunlai thiamna hmang tangkaia billing software thar, a hma ami aia tha leh mipui/ consumer tan pawha hriatthiam awl zawk, a vawikhatna atan state puma hman a ni chu hmasawnna lawmawm tak a ni tih a sawi a. Department hotute chu mipuiah an hnathawh leh harsatna an hrilhhriat zung zung a, an hrilh tam a ngai tih sawiin, mipui rawngbawltu an nihna laiah theihtawp chhuah tlan a ngai tih a sawi.
Mizoram hmun hrang hranga kan harsatna lian ber, transformer indaih lohna phuhruk turin transformer thar leina tur budget-ah sum dah belh a ni a, tunah pawh transformer thar 60 lei belh leh tuma buaipui mek a ni tih a sawi. State chhung hmun hrang hranga kawlphetha pekna transmission line pawimawh zualte double source nei vek turin hma lak mek a ni tih a sawi bawk.
He hunah hian revenue hmu tha leh AT&C loss nei tlem Sub-Division hnenah lawmman sem a ni. Electrical accident chungchang inzirtirna video clip tawi/ reels insiamsiak result puana lawmman hlan nghal a ni.
Tunah hian Mizoram pumah consumer 310130 awmin heng zinga consumer 201843-in kumin August bill an pe tawh a, bill dawn tawh zawng zawng hi cheng vaibelchhe 17.73 niin, online payment-a bill dawn zat chu vbch. 9.92 a ni a, counter-a bill dawn zat chu vbch. 7.81 a ni.