Ruahsur nasa avanga Mizoram hmun hrang hranga kawlphetha pekna chhia siamthat hna thawh mek dinhmun thlirin Power & Electricity minister F Rodingliana hoin department hotute an thukhawm.
District hrang hranga power line chhia thawmthat mekte enhoin, tun dinhmunah 33kV North Bukpui Sub Station tih loh Sub-Station zawng zawng atangin power an dawng kim tawh a. North Bukpui Sub-Station pekna line endik mek a ni. Hun reiloteah power pekchhuah theih beisei a nih thu sawi niin, khaw thenkhat power supply pekchhawnna feeder thenkhat line chhia awm pawh a tahtawlin siamthat mek zel a ni tih sawi a ni.
Distribution transformer chhiate thlak mek zel a ni a, Thawhlehni bik khan transformer 5 pekchhuah a ni. Aizawl bikah khaw chhia leh harsatna dang a awm loh chuan Nilaini ral hma in power pek kim theih beisei a ni.
Chawnpui Sub-Station atanga Aizawl West lama power pekna, a bikin Dinthar Veng, Tuikual leh Dawrpui Vengthar chawmtu line, tunhnaia chhe zing bik chu tih ziaawmna turin a ranglama bawhzui tum a ni a. Hna hmasaah feeder pumpui shutdown lak ngai loa a chhe lai thliarhran zung zung theihna turin ‘line gang’ vuah nise, tih a ni.
Hetihlai hian Union Power minister-in P&E minister F Rodingliana hnena 2024 August 5-a a lo tiam tawh angin, Zuangtui leh Bukpui inkar 132kV line load tam zawk keng thei HTLS conductor-a thlakna tur leh Mizoram Sub-Station pasarih – Bawktlang, Saitual, Melriat, Khawzawl, Champhai, Serchhip Bukpui, East Lungdar transformer lian zawk dahna tur cheng vaibelchhe 47.87 chu DoNER ministry-in a pekchhuak tawh tih sawi a ni.
He project hi zawh a nih chuan Zuangtui leh Bukpui (Serchhip) inkara mw80 chauh load la thei thin chu mw 200 thleng load an la thei tawh dawn a. Hei hi district pali – Saitual, Khawzawl, Champhai leh Serchhip ten an tangkai pui hle dawn tih minister hian a sawi a ni.
Power line chhia siam zo hnai
