Power man pek that vangin rebate nuai 108 kan hmu let
Kum kal mekah Mizoram-in kawlphetha a leina man a pek that avangin an leina atangin cheng nuai 108.78 pek let an ni tawh tih Power minister F Rodingliana chuan a sawi.
Lengteng bial khaw hrang hrang fang mek Lengteng bialtu MLA F Rodingliana hian, 2023 MLA inthlanpui hmaa an lo sawi tawh, electric bill an ti pung dawn lo an tih chu tipung loin kum khat an kal ta a. Sawrkarin power man ba cheng vaibelchhia 448 a pe tawh a, power hralhna atangin vaibelchhe tam tak an hmu tawh tih a sawi.
Kum 2024- 2025 chhung hian power leina man an pek that vangin rebate nuai 108.78 an hmu a, kumhlui lam en chuan, 2023- 2024 chhungin power man pek that loh vangin sawrkarin nuai 513.85 a chawi thung tih a sawi a ni.
2028 MLA inthlanah ZPM party bak chu chief minister turah an buai a rinawm tih ZPM MLA hian a sawi a. VC inthlan hmaa sawhthing an lei loh chhan chu, sawrkar sum hmanga campaign-a an ngaih an hlauh vang a ni, tiin, “Tunah hian lei turin kan inruahman fel tawh a, Secondary Collection Centre pawh hmun 27-ah dah a ni tawh. A leina tur sum ruahman fel vek a ni,” F Rodingliana hian a ti.
Kumin chhungin pension sum vaibelchhe 258.75 pek chhuah niin, sawrkar hmasa in an mi leh sa contract an lo pek bill tang leh sawrkar in ruahmanna a lo siam, sum awm loh avanga k-deposit a an dah vaibelchhe 425.49 pek a ni tawh a. GP Fund diltute hnenah vaibelchhe 359.89 pe tawhin, kum 5 chhung PMGSY bill tang vaibelchhe 212 an pe a. Sawrkar hnathawk hlawh pawh a hun taka pek thin a ni tih a sawi bawk. “Hengte hian mipui sawrkar a nih zia a tichiang hle,” a ti.
Power man pek that vangin rebate nuai 108 kan hmu let
