PRAISE ON 2024 TOP 30 a hriat ta
October 14-16, 2024 chhung khan SYNFO leh Central KTP buatsaih Praise On 2024 (Mal zai Intihsiak) First Round chu Saron Veng Kohhran Jubilee Hall-ah neih a ni a. Mi 117 intihsiak zing atangin Second Round-a intihsiak chhunzawm turin mi sawmthum thlan chhuah an ni.
Praise On 2024 hi September 6, 2024 atang khan Audition bul tan a ni a. Aizawl pawnah Champhai, New Serchhip, Kolasib leh Lungleiah te Audition hi buatsaih a ni a, Aizawl Audition chu Tuikual Kohhranin an thleng a ni. Audition-ah hian mi 314 an tel a, First Round intihsiakna hmachhawn zui zel turin mi 117 an tling a. An zing atang hian Top 30 thlan chhuah an ni leh ta a ni.
Praise On Top 30 intihsiakna hi October 24 & 25 zanah te Saron Veng Kohhranah vek neih a ni ang a. Zan khatnaah Mizo Lengkhawm hla hmanga intihsiak a ni ang a, zan hnihnaah mahni hla sak duh zawng an sa ang a, Music track hman a ni ang. Zan hnihna intihsiak zawhah hian Top 10 thlan chhuah result puan zui a ni dawn a ni.
Kum 2024 Praise On intihsiak hi Judge pathum – Upa F. Lalthanmawia, Bungkawn; Nl. R. Lalrinmawii (Arini), Leitan leh Pu Michael Lalneihtluanga, Mission Veng te bakah Guest Judge, Tv. H. Lalthazuala ten an endik thin a. Anni hian Audition atanga en dik tanin a tawp thlengin an endik dawn a ni.
Top 30 intihsiakna hi Live-in en theih a ni dawn a. Synod Information YouTube Channel leh Hruaina Eng TV (LPS 15 & Zonet 12)-ah te tihchhuah a ni ang.
PRAISE ON 2024 TOP 30 a hriat ta
