Hmeichhe referee-te hi khawvel football match-ah thuk takin inrawlh tawh mah se English top flight-ah hian referee tura chhawr an la hlawh lo tlat a, mahse, tunah chuan boruak a inher-danglam ve ta a, December ni 23 zana Fulham leh Burnley inkhel ham tura ruat Rebecca Welch chu Premier League fixture-a hmeichhe referee kan hmuh hmasakber tur a ni.
Kum 40 mi Welch hian kum 2010 atang khan ‘refereeing’ a buaipui tan a, kumin January thla khan Premier League hnuai chiah men’s Championship game ham thei hmeichhe referee hmasaber a lo ni tawh a, tunah record pui zawk a siam zui leh dawn a ni.
Tunthla kal mek December thla chhung vek hian Sam Allison pawhin top-flight match a enkawl dawn a, kum 15 chhunga Premier League-in mihang referee a chhawr vawi-khatna tur a ni dawn bawk.
Allison-a referee-na tur hi December ni 26-a Sheffield United leh Luton inkhel tur hi a ni.
He league-a black referee kan hmuh hnuhnungber Uriah Rennie kha kum 2009 daih tawh khan English football top four division enkawltu a nihna atangin a lo chawl tawh a; EFL-a mingo ni lo (non-white referee) hnuhnungber – Jarnail Singh pawh kum 2010 khan a lo chawl tawh bawk.
Football Association Referees chief Howard Webb chuan BBC Sport hnenah theihna sang tak kawltu official pahnih Rebecca leh Sam-te hun rawn inherchhuak ta chu hun chhinchhiahtlak a nih thu sawi chungin an phu ve reng tih a tarlang tel.
Kumin July thla khan Football Association chuan an ruahmanna thar siam tarchhuakin, an hnuaia thawk referee an lak thar turte atanga 50% chuang chu background hniam zawkte atangin an tinzawn tih a sawi a, an project kalpui tur chu kum 2026 thleng awh phawt tur a nih thu sawi chungin kum thum chhunga hmeichhe referee 1,000 lak tlin tum a nih thu leh mihang leh Asian referee 1,000 tal lak tlin an tum thu an puang bawk.
Tun dinhmuna English football-a mihang leh Asian mi official an chhawr zat belhkhawm chuan a pumpui atanga zaa pariat chiah a hawlh pha a, professional football bikah phei chuan 3% chiah a ni nghe nghe. Kum 2008-a Rennie final match hnu lamah phei kha chuan English Premier League bikah black emaw Asian hnam emaw referee atan an la chhawr leh lo.
English top flight-a mihang kan hmuh leh tur Allison hi kangthelhtu (firefighter) ni thin a ni a; ani hian England rama hnam tlem leh hnuaihnung zawkte atanga official tam zawk an chhuah theihna turin thu leh hla a lo cheh fo tawh thin a; amah ngei pawh hian hmasawnna hmel hmuin, kum 2020 khan Football League inkhel vil tura kaisantir a ni a, kumin kumtir lamah Championship a kai chho a, tunah Premier League inkhel a ham tur thu hriat tur a awm zui leh ta a ni.
English Premier League fixture-a hmeichhe referee kan hmuh hmasakber tur Welch pawh hian kumin atangin Cham-pionship inkhel a ham tan a; Women’s Super League leh Women’s Champions League match-ho bakah kumin nipui thawt laia Australia leh New Zealand rama Women’s World Cup-ah pawh khan referee-ah a lo tang tawh bawk.
Nikum khan hmeichhiate zinga FA Cup third-round inkhel vil thei hmasaber niin, chumi hmain mipa inkhel hamtu tur EFL national list-ah telh a ni a, League One leh League Two fixture lamah referee a lo ni tawh bawk a ni.
Kumin November thla liamta mai khan English referee lar leh hmingtha Welch hian history thar siam tawh bawkin, Premier League refereeing team-a hmeichhe tel hmasaber niin, Craven Cottage-a Manchester United-in sikhat faia mualneitu Fulham an hneh tumhan fourth official a ni.
Premier League hmeichhe referee hmasaber tur Rebecca Welch
