Presbyterian English School-in HSLC 2025-a titha ho lawmpui

Presbyterian English School-in
HSLC 2025-a titha ho lawmpui
Presbyterian English School (PES) hnuaia HSLC 2025 result tha Nilaini khan Aizawlah lawm a ni.
Hmanpuitu Synod moderator Rev RC Lalnghakliana’n mimal tithate hnenah lawmman a sem a; executive secretary i/c Education Rev Dr Rosiamliana Tochhawng chuan school tithate hnenah lawmman a sem.
Zirlai tithate chawimawinaah hian distinction-a pass 51 hnenah lawmpuina Rs. 10000 theuh pek an ni a. PES zirlai zinga HSLC result-a top 3 tan Special Award siam niin, lawmman hian sumfai leh thuziak a keng a ni.
HSLC result-a top 3 lawmman dawngtute chu: 1-na Vanlalnunpuii, Mamit PES; 2-na Christy Lalnunhlui, Tlungvel PES leh Isak Zairemtluanga, Thingsulthliah PES; 3-na Lalhriatsanga, Zemabawk North PES; Lallawmzuala, Zemabawk North PES leh Lalramdintluangi, Serchhip PES an ni.
PES atang hian HSLC 100% pass school 11 awm zinga a titha school pathum hnenah lawmman – computer set, thuziak leh sumfai pek an ni a. Khawzawl Vengthar PES, Zotlang PES leh Serchhip PES an ni.
Heng bakah hian pass kim vek school pasarih hnenah Rs. 10000 theuh hlan an ni bawk.
Tun dinhmunah Presbyterian English School zingah pawl 10 nei chin school 38 an awm a. HSLC exam zawng zawng zirlai 892 an ni a, chu’ng zinga zirlai 805-in an pass. Distinction-ah 57, first division 275, second division 369, third division 104 niin, PES pass percentage hi 90.25% a ni.