President lawm lohnaa insawi fiah turin Bengal sorkar hriattir

President lawm lohnaa insawi fiah turin Bengal sorkar hriattir
Sorkar laipui chuan Inrinnia President Droupadi Murmu-i’n West Bengal-a tribal conference-a tel tura tih dan tur zam (protocol) zawm a nih loh chungchangah West Bengal thuneitute chu insawi fiah turin a ti a. Union Home Secretary Govind Mohan chuan chief secretary hnenah Pathianni tlai dar 05:00 hmaa report thehlut turin a ti.
President lo dawnsawn dan tur ruahmanna siam zawm loh te, International Santal Conference neihna hmun tur chawpchilh taka tihdanglam te, kawngpui zawh tur thlak te leh a tlawh chhunga a tlawh tur hmun ruahmanna siam dan chungchanga thil kal dan dil a ni.
President Murmu-i’n West Bengal sorkarin ruahmanna siam dana a lungawi loh thu a sawi hnu tukah sorkar hian insawi fiah tura tihna hi a pe a. Darjeeling district-a International Santal Conference neihna tur hmun sawn tura thutlukna siam leh a lo dawngsawng tur state minister an awm loh avangin a lungawi loh thu a sawi bawk.
A tirah chuan he conference hi Darjeeling district-a Phansidewa block hnuaia Bidhannagar-ah neih tura ruahman a ni a; mahse, state sorkar chuan Bagdogra-a Gossainpur-ah a sawn a, district khat chhunga Siliguri khawpui pawna awm a ni.
Gossainpur-a conference-a a tel hnuah President Murmu hian kilometre 30 vel zet Bidhannagar a pan a, hetah hian mipuite hmaah thu a sawi a, hmun thlak danglam chungchangah a lungawi loh thu a sawi a ni.
Bidhannagar-a hmun ruahman hmasak chu mipui tam tak dawl zo tur a nih thu leh thlak a nih chhan a zawt bawk.
President chuan Bidhannagar-a hmun zau tak chu awlsam takin mi nuai eng emaw zat pungkhawm theihna tur a nih thu a sawi a. Santal khawtlang mipui tam tak chu an awmna hmun atanga hla taka neih a nih avangin tam tak an tel thei lo tih a sawi.
Murmu-i hian a tlawh chhunga state sorkar aiawh an awm loh avangin a lungawi loh thu a sawi bawk.
Tih dan thin pangngaiah chuan president-in a tlawh chuan chief minister leh state minister-ten an lo dawngsawng thin tih a sawi.
‘Bengal fanu’ anga a inngaih laiin hetiang a tawng hi state hruaitute atanga lungawi lohna a awm em ni tih a zawt a. An state nena inzawmna nghet tak neiah a inngai tih sawi, “Kei pawh hi Bengal fanu ka ni a, Mamata Didi pawh hi ka laizawn a ni a, ka nau a ni bawk a. Ka chungah a thinrim nge tih ka hre lo va, hetiang thil hi a thleng ta a ni,” a ti.
Union home ministry chuan president thusawi hi a ngaihtuah a, home secretary-in West Bengal sorkar chu a hmun thlak a nih chhan leh thil thleng dangte chu chiang zawka sawi turin a ngen ta a. State sorkar chhanna erawh he chanchin buatsaih lai hian hriat hman a ni lo.