President Droupadi Murmu leh prime Minister Narendra Modi te chuan December 19-a TMC leader in Vice President Jagdeep Dhankhar tih dan a zir chungchangah Vice president chu an thlawp tlat thu an sawi a. Prime Minister Narendra Modi chuan Parliament complex a MP thenkhatte chetlak dan chu ‘lemchanna hnawltlak’ tiin a sawi.
“Prime Minister hnen atangin phone call ka dawng a. MP thenkhatte chetlak dan lemchan chhe tak Parliament complex zahawm taka an neih chu a dem thu min hrilh a ni” tiin Vice President’s Secretariat chuan a tarlang.
“Hetianga inhmuhsitna hi kum sawm hnih chuang a tawn tawh thu sawiin mahse Constitutional office Vice President leh Parliament a a thleng chu vanduaithlak a tih thu min hrilh a ni” tiin Dhankhar chuan a sawi bawk a.
Dhankhar chuan Prime Minister hnenah hetiang mai maia an chetlakna chuan a tihtur a thulh phah tir dawn lo tia a hrilh thu a sawi bawk a.
“Prime Minister hnenah mi thenkhatte chet lak dan mai mai chuan ka tihtur leh Constitutiona a principle intarlang te ka kenkawhna a dal dawn lo. Hengte tihhlawhtlin leh humhim hi ka rilru chhungril bera ka tum a ni a. Hetianga inhmuhsitna mai mai hian ka kawng a dal dawn lo tih ka hrilh a ni,” tiin Dhankhar chuan a sawi bawk.
President Droupadi Murmu pawhin, “Parliament complex a kan vice president an hmuhsit dan ka hmu kha hrehawm ka ti a ni. Mipui thlante hian an duh ang ang an sawi thei a, mahse zahawmna a keng tel tur a ni thung. Chu chu parliament tradition kan chhuan em em leh India mipuite pawhin kengkawh tura min duh chu a ni,” tiin a sawi bawk.
December 19 khan MP rual hnawhchhuah an nih karah Trinamool Congress leader Kalyan Banerjee chuan Parliament step-ah Dhankhar tihdan ngeiawm takin a zirsak a.
Congress leader Rahul Gandhi chuan Banerjee an Dhankhar tihdan a zirlai chu video-in a lo laksak zui a ni.
Dhankhar pawhin Rajya Sabha-ah a rilru nat thu sawiin loneitu a nihna leh Jat a nihna chu hmuhsitin a awm a ti a.
“Member of Parliament-in chairman tihdan zira a nuihsawh lai senior leader in video a a lo lak hmuh bawk chuan ka rilru a thil awm tur in ngaihtuah thiam mai ang” tiin Rajysa Sabha-ah a sawi zui a.
“Twitter official handle hmangin party thupuangtuin min dahhniam a, hmuhsitna, loneitu ka nihna leh Jat ka nihna te bakah chairman ka nihna min nuihsawh a nia,” tiin Dhakhar chuan a sawi bawk.
President leh PM ten Vice-president thlawp tlat
