Mizo ram leh hnam mila primary school textbook siam tura primary zirtirtute rawtna chu an thlawp tih PC party chuan an sawi.
PC Gen. Hqrs. thuchhuak chuan, Mizoram Primary Teachers’ Association-in primary school textbook chu Mizo ram leh hnam mila siam ni se, tia resolution an siam chu an party ‘Education Policy’ lo duan tawh a ni, tiin, kan thlawp tih a sawi.
‘Kan ram, kan hnam, kan sakhua a him tur a ni, tih PC party thupui mila uluk taka naupang zirlaibu buatsaih hian thiamna mai bakah tisa leh thlarauah leh kan hlutzawngte tuh a nih a, zirlaite hmalam hun leh nun, thui tak a kaihhruai theih dawn avangin pawimawh kan ti takzet a ni,’ a ti.
India Danpuiah primary school education zirlaibu ziah chu state-ten a an tih tura tih a nih bakah danpui hnuaiah vek hian education chu Concurrent list hnuaia awm a nih angin, state-in a huamchhungah thlak danglam leh siamthat ngai laiah thuneihna a nei a ni tih hre chungin, primary school zirlaibu ziah that chu an party chuan a thlawp tih sawiin, India sawrkarin school zirlaibute NCERT-in ziak vek tura hma a lak meknaah zirlaibu hi nasa taka thlak danglam mekin, naupang rilruah sakhuana rawngkai thil leh politics-a tete emaw hamthatna awm thei zawnga hmalakna a lian hle tih a sawi a ni.
‘Nunphung leh kan thil hlut zawngte a tlahniam hle tawh a. Hetihlai hian Mizo zirlaite, a bikin primary school zirlaite hi kawng hrang hrangah ven leh an nuna thil hlu leh tha tuh a ngai a; zirlaibu hmang pawhin Mizo hnam, ram leh sakhaw venhim hna leh kan hlutzawng tuh hna hi thawh theih turah kan ngai,’ PC thuchhuah chuan a ti.
Primary zirtirtute rawtna thlawp
![](https://theaizawlpost.org/wp-content/uploads/tap_logo-min-large.jpg)