Chief Minister Lalduhoma’n Prime Minister Narendra Modi a hmu a. Thenzawl Peace City Project te, Aizawl to Thenzawl kawngpui National Highway-a siam chungchang te, Handholding Policy te, tunhnaia Chin Hills, Myanmar-a buainain Mizoram a nghawng dan chungchangte an sawi dun, tih chu sawrkar thuchhuaha tarlan dan a ni.
Thil pakhatah erawh Prime Minister thu leh hla tarlan a ni. Chu chu, ‘Tripura atanga Mizorama gas pipeline lo luhna tura hna kalpui mekah, a kaltlangna tur Mamit district DC chu chak lehzuala hma la tura a duh thu chief minister hi a lo hrilh’ tih a ni.
Chief minister-in Prime Minister meuh a hmu a ni a, mipuiin Prime Minister thu leh hla chipchiar zawk hriat kan chak ngei ang; mahse, ‘an sawi dun’ tih bak hriat tur a awm tam lo hle a ni.
Eng pawh ni se, Prime Minister-in Tripura leh Mizoram thlunzawmtu tur Gas Pipeline a rawn vei a, gas pipline-in a paltlang thui ber tur Mamit district a nih avanga chak taka hma la tura Mamit DC a rawn phut hi chu a lawmawm ve hrim hrim. Kan state hruaitute pawhin nawrpui ve se a tha ang.
Kan hriat angin, he gas pipeline-in a rawn thlunzawm tur Sihhmuia hna thawh mek supply minister B.Lalchhanzova’n kumin kumtir January thlaa a tlawh khan, gas pipe hi Mizoram bikah Km 17 phum a nih tawh thu a sawi a. Tripura state chhung Panisagar atanga Sihhmui thleng hi pipeline Km 127-a thui kal tur a ni.
A hnu lawk April ni 7-ah gas pipeline chungchangah bawk hian supply minister hovin Mamit DC office-ah review meeting neih a ni a, khatah khan pipeline phum zawh tawh chu Km 23.148 a nih thu tarlan a ni. Tichuan, Mizoram chhunga April thla thlenga gas pipe phum tawh thui zawng chu Km 40.148 tihna a ni.
He project hi March 31, 2027-a zawhfel hman tura ruahman a ni a, tunah hian chawhrualin thla tin Km 6-7 vel thawk ang an ni. Project zawhfelna tur hian thla 18 vel a la awm a, hna lo thawh dan atanga chhutin thla 18 chhung hian pipe phum hna chauh hi chu zawh fel hman hram theih a rinawm.
Pipe phum hna hi Indradhanush Gas Grid Limited (IGGL, Assam) hian an thawh zawh hnuah, Tripura Natural Gas Company Limited (TNGCL) ten household connection an thawk ve leh thung dawn a ni.
Chuti a nih chuan, hna kalpui dan han en hian, March ni 31, 2027-ah zawhfel hman a nih a rinawm ta lo. Prime Minister hian hna a kal chak lo tih min rawn hmuhpui pha tihna a ni; a tlawmthlak zawng pawhin a ngaih theih ang. Tuna hna thawh dan let thawka chaka thawh a ngai ta tihna a ni ber awm e.
