Mizoram Universal Health Care Scheme (MUHCS) hnuaia cashless kalpuiah kartinin damdawi in bill pek thin a ni dawn a, an buai lo turah a ngai tih sawrkar chuan a sawi. Mizoram State Health Care Society chuan MUHCS kalpui mekah private hospital intelkhawm pawl – Non Government Hospital Association Mizoram (NGHAM) in an dinhmun an sawifiahnaah thil hriat kim loh leh hriatchian loh awma a lan avangin mipui hriat atan thil nih dan dik tak tarlangin thuchhuah a siam tih a sawi.
NGHAM-in cashless avangin nitin sum lut awm lo tura an ngai chu sawrkar chuan cheng nuai 50 advance-a pek a inhuam thu a sawi tawh bakah kartinin damdawi in bill hi pek thin a nih avangin an buai lo turah a ngai tih a sawi.
‘MUHCS rate 50% -80% vela hniam zawk anga sawi hi hriatchian loh vang niin a lang a. Entirnan, Aizawla private damdawi in lian atanga State Health Care Society-in kum hmasa lama claim a dawn atanga chhutin, rilphir zai senso chu chawhrualin Rs. 36250 (room luah man telin) a ni. MUHCS-ah hian rilphir zai hi base rate Rs 25000 ni mah se, heng damdawi in hian additional incentive an dawn tur zat nena belhkhawmin package rate hi Rs. 32500- 35000 thleng a ni thei a. Damlo chu a entitlement azirin cabin/ semi cabin-a a awm a nih chuan, room man hi package rate tarlan bakah damdawi in hian an bill belh thei bawk. Heti hian room luah man nen chuan Rs. 36250 aiin a sang zawk dawn a ni,’ a ti.
Phai hospital leh Mizoram private hospital chu rate, quality leh grading-ah khaikhin chi a ni lo chungin, sawrkarin phai hospital-te nen rate inang tlang a offer bakah a piahlam pawh sawipui a inhuam cheu tih a sawi a ni.
Phailam non-empanelled hospital ho reimbursement phalsak anga sawi chu a dik ziktluak lo tih sawiin, ‘MUCHS guidelines ang chuan, emergency-ah emaw empanelled hospital-ten an enkawl theih loh natna bikah phai emaw Mizoram pawh nise, non-empanelled hospital-ah chuan reimbursement tih theih a ni,’ a ti.
Mipui nawlpui, a bikin harsa zawkte leh sawrkar hnathawk tam takin damloh nikhuaa inkhul chhuahna tur sum an neih loh dan, puk chawpa inkhul chhuak leh mahni in leh lo hial tihral ngai khawpa mangang an awm thin tih a hriat avangin sawrkar chuan cashless-in ‘mipui healthcare’ a kalpui a. Hei hi sawrkar chuan mipui tan tha a ti hle tih a sawi bawk
‘Sawrkar chuan mipui hmakhua ngaiin private hospital-te nen inrawn tlangin, dawhkan khat kilhoa inbiakremna kawng zawn zel hi a duh dan a ni,’ a ti.
Private damdawi in ho hnenah sawrkarin kartin bill pek inhuam
