Private hospital-a emergency case
refer-ah sawrkar khirh tawh dawn
Mizoram Universal Health Care Scheme la zawm lo damdawi in hnena emergency case bika pantute tana inenkawlna senso bill theiha tih chu fir zawkin an kalpui tawh dawn tih chief minister Lalduhoma chuan a sawi.
Assembly Session-ah chief minister hian, Mizoram Universal Health Care Scheme (MUCHS) la zawm lo private damdawi in hoah damlo emergency tak tak, ICU-a dah ngai leh zai rum rum ngai ang chi refer theihin sawrkarin a phalsak a, an refer hnem ta deuh nge, heng damdawi in hi an rate a lo sang bawk nen, damloin MUCHS hnuaia a bill theih cheng nuai 5 chu an ei ral chak ta bik a, he Scheme hi la zawm lo mah se, heng private damdawi in hian a zawmtu damdawi in ai mah mahin MUCHS hi an hlawkpui ta tho tih a sawi.
“Min zawm duh loh chhan a ni mai awm mange kan ti a, tun atang chuan refer case hi a nihna ang taka kal turin kan strict tawh dawn. An ni pawh min zawm turin kan la sawm reng a ni,” a ti.
Tuna Mizoram sawrkarin health care system a hmanah damlo bill a daih vek kher loa, chutianga daih khawp chu khawvelah tumahin an pek theih a ring lo tih chief minister hian a sawi. “A chin a awm a, a chin bak chu kan la tlin bik lo. Nuai 5 bak chu sen belh a ngai ve tawh,” a ti.
Private hospital-a emergency case refer-ah sawrkar khirh tawh dawn
