Tata SK 612 LPS Pro Fight title fight-a an inlan rualin F. Lalthanliana Junior, Ramdinthara, Vanlalruatpuia leh C. Lalhruaitluangate’n professional boxing an luhchilh dawn.
Nikumah semi-final atangin profe-ssional boxing ziahluhna boxrec-ah Pro Fight inhnek chhinchhiah vek a ni a, kuminah Title Fight chuah ziah luh a ni dawn a, supervisor turin Indian Boxing Council president Brigadier PKM Raja a lo kal dawn a ni.
Lunglei Ramthar boxer Thanliana’n middleweight final lutin zirtawpni zanah LPS Arena, Falkland-ah Chawngtlai fighter C Lalhruaitluanga nen champion nih an inchuh dawn a; kumin kum tir Mizoram Fight Night lightheavy champion Thanliana’n profe-ssional boxing a khelh hmasak ber tur a ni a, a bitum tur Hruaia’n hnuhma tha tak nei mekin professional boxing a khelh tawh vawi rukah chak vekin mi pathum a knockout a ni.
Nikum Pro Fight bantam round of 16-ah Pangzawl tlangval Ramdina a tla a, kuminah final lutin rin hlawh Laldinsanga nen zirtawpni zanah title an inchuh dawn a, boxrec-a a inziah luhna hmasa berah hnehna chang nghal turin a hmabak a hautak dawn hle a, a inhnekpui tur Lunglei Ramthar tlangvalin professional boxing vawi nga khel tawhin a chak vek a, mi pali a knockout a ni.
Saikhamakawn rawlthar Ruatpuia’n inrinni zan welter title fight-ah Mission Veng boxing Lalruatzela Hauzel a hmachhawn dawn a, inbeitawk hle tura ngaih an ni. Pro Fight-a a tel vawi hnihnaah Ruatpuia’n final a luh avangin professional boxing a luhchilh thei dawn a, Ruatzela’n sulhnu chia siam tha turin hun tha a nei ve thung a, nikum semifinal-ah tlain boxrec-a a inziahluhna hmasa berah a tlawm a, kumin March khan LPS Fight Night-ah Vanlalringa (Serchhip) a hneh lo leh a, professional boxing a khelh tawhah a tlawm ve ve a ni.
Cherhlun boxer Hruaia’n light title fight-ah fiahna hmachhawnin Chawngtlai tlangval HC Lalramfela a bitum dawn a, professional boxing a khelh vawi khatna tur a ni nghal a, 2015 Pro Fight bantam champion Ramfela’n tum nga hnehna chang tawhin vawi hnih a tlawm a, Hruaia nen an intawng rualin professional boxing tum riat a khelhna tur a ni.
Pro boxing luhchilh dawn
