Pro Fight inhnek chanchin kal zel
Thawhtanni zan Mizoram Labour Link LPS Pro Fight inhnek [akhatah Round hnihna khel zo thei loin Malsawmtluanga lakah Lalremthanga Hmar a tlawm a, inhnek dangah Thangbiakdik chuan Remruatpuia a hneh.
LPS Arena, Falkland-ah a vawi hnih nan mipui lawm hlawh ‘Zo Awle’ Remthanga a inlan a, Ratu rawlthar Sawmtluanga’n chhiar ngai khawpa a hnek hnuah kum 30 mi Remthanga’n bei zui leh mah se a ding tluan zo lo a, round hnihna minute hnihnaah technical knockout-in kum Sawmtluanga a chak a, Inrinni zanah |awipui South boxer N. Lalhruaizela nen an inhmachhawn ang.
A tir atangin inhawng takin Remthanga leh Sawmtluanga an inhnek tawn hnem a, hnek thiam leh tlo zawk Ratu rawlthar a chungnung a, round hnihnaah a kut ding lamin chiang takin a vai tlu a ni.
Referee Hriata Chhunthang chuan chhiarin Remthanga tho chhuakin inbei leh mah se, Sawmtluanga’n nawr hnehin an inhnek tawn hle a, tlu zui lo mah se Sakawrdai boxer-in a peih tawh lo va, hruihrual kilah thuin a team-ten towel an vawm lut a ni.
Flyweight inhnek dangah Ramthar North boxer Zakaria Lalneihpuia’n round hmasa ber a hloh hnuah awmze neiin Jacob Lalduhsaka (Chawntlangpui) a hnek zui a, round hnuhnung pahnih lain unanimous decision-in a chak.
Nghalchawm tlangval Moses Lawmkimthanga’n thiamna a neih hmangin Kevin Vanlalduhsaka (Bethlehem) a thunun ve thung a, round hnihna minute khat leh second 55-ah technical knockout-in a hneh a ni.
Bantam-ah inhnek vawi thum tho awmin Lamka, Manipur boxer Thangbiakdik chuan boxing tha pangngai tak lantirin Remruatpuia (Lungzarhtum) lakah round thum a la vek a, unanimous decision-a a chak rualin Orient Goldsmith Fighter of the Night a dawng.
Thahrui nei tha Lungzarhtum rawlthar Ruatpuia’n a tawp thlengin mar tha takin khel mah se Biakdika kut chhuak a rang a, a taksa leh a lu-ah hnek zawnsak foin a dang hneh lo.
Inhnek dangah Niawhtlang tlangval Joab Lalrinawma’n round hmasa berah hnek hneh mah se round hnihna atangin Bawngkawn boxer Malsawmtluanga a insiamtha a, tha taka inveng chungin nghet takin a bei tluan a, judge pahnihin 29-28-in an chaktir a, pakhatin 29-28 thovin Rinawma chaktir mah se split decision-in Sawmtluanga a chak a ni.
Sairang boxer Lalrohlua’n split decision-in Bijay Rai (Bawngkawn) a hneh bawk a, judge pahnihin 29-28-in an chaktir a, pakhatin 29-28-in Bijay an chaktir a ni. An inhnek hnem dun hle a, thahrui leh tharum ngah zawk Rohlua a dingchang hram a ni.
Light-ah Edenthar boxer Lalthazuala’n Lalramsawna (Ratu) a awpbet a, thiamna leh an kut chhuak a inthlau a, round hnihna minute khat leh second 12-ah technical knockout-in a chak.
Dulte boxer Barnaba Lalmuanpuia’n awlsam takin Jacob Lalrokima Khiangte (Kelsih) a hneh bawk a, round hma tluan lovin minute khat leh second sarihah technical knockout-in a chak a ni.
Inhnehtawk takin Malsawmkima (Vaphai) leh Jeho Vanlalpekhlua (Rangvamual) an inhnek ve thung a, Judge pathum point pekah 29-28, 29-28, 29-28-in Sawmkima a chak.
Welter-ah James VL Khawngaihkima’n VL Khawngaiha a hnek tam hle a, huaisen takin Ailawng boxer Khawngaiha’n bei let mah se a tuar hnem a, round hnihna laihawlah technical knockout-in Bethlehem rawlthar Khawngaihkima a chak a ni.
Round khat khel tluan lovin Khatla South boxer Lalremtluanga Vantawl chuan Lalhruaizela (North Chawnpui) a hneh bawk a, minute hnih leh second 29 an inhnek hnuah technical knockout-in a chak.
Middle-ah Lunglei Sazaikawn boxer PC Lalramengmawia’n harsa takin Chanmari West tlangval Vanlalmaka a hneh a, split decision-a chak rualin round of 16 a lut.
Inhnehtawk takin an inbei tluan a, Engmawia’n inveng chungin a pan a, hnek chhuak tam lo viau chungin a hnek fuh a langsar a, veikhawr Maka’n chiang takin round hnihna la mah se judge pahnihin 29-28 ve vein Engmawia an chaktir a, pakhatin 29-28-in Maka a chaktir ve thung a ni.
Pro Fight inhnek chanchin kal zel
