Mizoram Labour Link LPS Pro Fight title chuh turin boxer 80 chuangin lehkha an thehlut tawh a, tel tum tan inpekna hun thla chanve a la awm.
August ni 1 atangin application form lakchhuaha thehluhna hun hawn a ni a, August ni 15, Inrinni tlai thlenga lehkha pek chhuah tawh 230 atangin boxer 82-in tel tumin an thehlut a, August ni 31 thleng hun hawn a ni.
Kum 17 atanga 40 inkar, Mizoram chhung leh pawn atangin a duh apiang tan a tel theih a, tel tura inpe lut zingah Mizo mai ni loin Mizorama Gorkhali-te leh state dang Meghalay atangin an tel tawh a, Lamka, Manipur atangin boxer sawm rualin an tel dawn tih an sawi chiang tawh bawk.
Pro Fight hnuhnung ber 2024-a che chhe lo tak tak Lalruatmawia (Chhiahtlang), Sebastian VL Rinnunga (Ramthar Veng) leh Biaklawmthanga (Khuangleng) te chuan hmasawn leh zuala inlan tumin lehkha an theh lut a, quarterfinal lut tawh Benjamin Lalrindika leh tunhnaia boruak nei tak Lalremthanga Hmar chuan a vawi ruk nan tel a tum bawk a ni.
September ni 8-ah tan a ni dawn a, September 4, zing dar 8 atangin LPS Arena, Falkland-ah tel turte hriselna endikin an inbuk dawn a, tel tur zat dik tak a hriat theih dawn chauh a ni.
Weight hrang panga – fly, bantam, light, welter leh middle-ah title an inchuh dawn a, champion laiten kawnghren an humhim dawn a nih chuan anmahni weight tel zinga tha ber nen title fight-ah an inhmachhawn dawn a, champion laiin title an humhim dawn lo a nih chuan anmahni weight-a tel zinga a tha pahnihin champion thar nih tumin title an inchuh thung dawn a ni.
Lawmman pawisa fai cheng nuairuk singnga bakah mi mal chawimawina best boxer, promising boxer, best challenger, best referee leh best judge siam a ni a, inhnek zan apiangin fighter of the night thlan thin a ni bawk ang.
Kawng hrang hrangin inbuatsaihna a kal mek a, inhnek endik tur referee leh judge 12 koh fel tawh an ni a, thutlukna dik leh rin tlak siam chunga an mawhphurhna hlen tura beisei an ni a, tha taka inpuahchah turin hriattir an ni bawk a ni.
Inkhel result
Flyweight (kg 48-52) : Lalrinngheta (Tuipui)
Bantamweight (Kg 52-56) : Laldinsanga (Ramthar Lunglei)
Lightweight (Kg 56-61) : Lalkhawngaiha (Venghlui)
Welterweight (Kg 61-67) : Lallawmawma (Tuipui)
Middleweight (Kg 67-74) : F. Lalthanliana Junior (Electric Veng Lunglei)