Tata SK 612 LPS Pro Fight hmawrbawknaah Mizo boxer-te’n WBC India title chi hrang pathum an chuh tel dawn a, Mizoram boxing-in rahbi thar a kaina tur a ni dawn.
Zanin, Zirtawpni zan leh naktuk, Inrinni zanah LPS Arena, Falkland Vengah champion kawnghren inchuhin inhnek pariat a awm dawn a, Pro Fight organising co-mmittee chuan Mizoram boxing-in mellung phun belha rahbi thar a kai theihna’n hma an la tih an sawi.
Weight hrang hrangah Mizo boxer-te’n WBC India title a tam thei ang ber kawl thei se an duh a, chu chuan hma lam pana ke an pen zelna tura awmzia a neih ngei an ring a; Pro Fight title fight-in Mizoram mai bak Indian boxing huang chhungah boruak lian zawk a neih theihna tur a nih ngei an beisei tel.
Kumin LPS Pro Fight title fight hi professional boxing chhinchhiahna boxrec-a ziahluh vek tur a ni a; India rama professional boxing lama hotu ber Brigadier Brigadier PKM Raja a lo kal dawn a, ani bakah hian India rama pro boxing promoter langsar pahnihin lo kal an tum bawk.
Pro Fight-ah weight hrang panga awmin, zaninah middle leh bantam title fight buatsaih a ni dawn a; middleweight champion kawnghren inchuhin C. Lalhruaitluanga (Chawngtlai) leh F. Lalthanliana Jr. (Lunglei Electric Veng) an inhnek ang.
Bantamweight champion thar nih tumin Laldinsanga (Lunglei Ramthar) leh Ram-dinthara (Pangzawl) an innuai ve thung dawn a; WBC India super bantamweight title inchuhin F. Zoramchhana (Cher-hlun) leh Adil Rajesh Kumar Singh (Mumbai) intawngin, WBC India bantamweight title inchuhin Laldingliana (Tuipui) leh Pradish A (Chennai) an inhnek dawn a ni.
Inrinni zanah Pro Fight title fight pathum awm ve thungin, welter-ah Lalruatzela Hauzel (Mission Veng) leh Vanlal-ruatpuia (Saikhamakawn), lightweight-ah HC Lalramfela (Chawngtlai) leh C. Lalhruai-tluanga (Cherhlun), fly-ah NT Lalbiakkima (Siaha) leh Van-lalenkawltira (Champhai Din-thar) an inhmachhawn dawn a; Vanlalawmpuia (Khuangthing) leh Gugan Kumar (Chennai) chuan WBC India super light title an inchuh tel ang.
Pro Fight title fight hi round li zel tur a nih laiin WBC India championship erawh round riat tur a ni ve thung a; a hmuna en tur tan ticket Rs. 50 leh Rs. 500 man 52 siam tel a ni.
Pro Fight Title Fight: Mizoram boxing tiropuitu tur
