Pro Volleyball 2023 :
Mizo hlanga champion tum TNT
Thutak Nunpuitu Team-in Mizo hlangin Tata SK 712 Pro Volleyball League an khel dawn a, nikum final-a an tlawmna chhanlet theih ngei an inbeisei.
Kum 2016 atangin Pro Volleyball vawi rukna June ni 2 khian R. Dengthuama Indoor Stadium, Mualpuiah khelh tan a ni dawn a; vawi hnih champion tawh Hunthar nen chiah la tel kim vek thei an nih laiin TNT-in harsatna lian tak an nei a, final-ah tum hnih an tlawm tawh.
Coach Lalhmangaih-sanga Sailo chuan Mizo-ram pawn atanga player tha an lakluh ve loh avangin a vawrtawpah an hriam tawk lo deuh tih a pha lo a, nikum final-ah Durtlang North-in 25-20, 23-25, 25-21, 25-23 (3-1)-in Mizo player hlanga khel awm chhun TNT an hneh a, a vawikhatna’n an champion.
Hmangaihsanga chuan a vawikhatna’n Mizoram volleyball inelna sang berah champion an tum tih a sawi a; chutih rualin state pawn atanga player tha lalut chuang loin an neih sate tha zawka chhawr theih tumin an inpuahchah tih a sawi.
2022 Pro Volleyball Mizo player tha ber Vanlaltanchhana leh tunlaia hmasawna tak Zosangzuala an kawl a, TNT coach chuan: “Kuminah tha zawk, nghet zawk leh tlo zawk turin kan inbuatsaih a, Pathian rin chhan chungin champion thei tur khawpa kan khelh theih ngei kan ring a ni,” a ti.
TNT sports in-charge Lalzawmliana chuan rawngbawlna’n volleyball an kalpui tih a sawi rualin, senso a hautak avang leh chhan dang avangin team tichak turin Mizoram pawn atangin player tha an lalut dawn lo tih a sawi ve bawk.
Mizoram volley-ball hmunpui pawimawh langsar pakhat TNT mipa team hian Pro Volleyball an khelh hnuhnun berah an hneh loh Durtlang North hmachhawnin league bul an tan dawn a, karleh Zirtawpni, champion-ship hawn zanah an tlawmna chhanlet tumin khelmual an lut ang.
Pro Volleyball 2023 : Mizo hlanga champion tum TNT
![](https://theaizawlpost.org/wp-content/uploads/2023/05/volley.jpg)