Project kalpui turah dan loa thil
tih chhui turin Lokayukta ngen
School Education department hnuaia Samagra Siksha Mizoram leh Tharthilthlentu Entrepreneurship and MSME Support Society (TiLi) in ‘Project Intodelh Inzirtirna 2024- 2025’ an kalpui turah dan lo anga thil tih a awm nual niin Congress Thalai chuan an sawi a. Thawhlehni khan Lokayukta hnenah chhuichian sak tura ngenna ziakin an thehlut.
Congress Thalai Hqrs. hruaitute sawi danin, kumin July 1 khan Education department hnuaia Samagra Shiksha leh TiLi hian ‘Project Intodelh Inzirtirna’ atan hian inremna (agreement) an ziak a. Inremna ang chuan, he project fund hi cheng nuai 59 a ni. Agreement-ah hian Education minister, TiLi neitu leh Samagra Shiksha hotuten hming an ziahhnan.
He project ruahman a nih dan chuan, sawrkar school 10 – high school 5 leh higher secondary school 5 thlan chhuaha zirlaite hnenah Project Intodelh kalpui tur a ni a. Central leh state fund 90:10 pattern hmanga thawh tur niin, cheng nuai 25 chunglamah project inkaihhruaina angin, tender chhuaha project kalpuitu thlan tur a ni. Mahse guideline-in a phut angin tender chhuah a ni loa, open tender koh dan tur pawh a inziak a, heng hi tih a ni lo hrim hrim tih an sawi.
He project atana sum pekchhuah dan tur hi, agreement-a ziah ang chuan, an fund hmuh atanga zaa 40, Rs. 23,60,000 chu 1st instalment-ah mobilisation advance atan project agreement ziah huna pek tur a ni a, chu chu project bul tanna atana hman tur a ni. 2nd installment zaa 30, Rs. 17,70,000 chu resource person-ten training an pek vek hnua pek tur niin, 3rd instalment zaa 30%, Rs. 17,70,000 chu project zawhfel hnua pek tur a ni tih Congress Thalai hian an sawi.
‘TiLi hi ZPM thupuangtu u fapa ta a ni a, party mi an induhsak loang, tituten danin a phut anga tender leh quotation chhuah loa project lian leh pawimawh, sum tam tak awmna, advance payment Rs. 23,60,000 an inpe hi a dik loin induhsakna uchuak taka an kalpui duh hi kalphung thar hian an hmui bak a pel lo a ni tih a lantir a. An intiam ang leh sawi ang letling chiahin an kal a ni,’ a ti.
Project kalpui turah dan loa thil tih chhui turin Lokayukta ngen
