PSG in final an lut

PSG in final an lut

PSG in final an lut
Nilai zan khan Fifa Club World Cup 2025 semi-final khelh zawh a ni a, semi-final hnuhnung zawkah PSG chuan 4-0 mgawtin Real Madrid an sawp a, Chelsea hmachhawn turin final an lut.
UEFA champions League champion Paris St Germain hian Europe a club hlawhtling ber Real Madrid an ngam hle a, chawlhlawk hmain goal thum ngawt an thun hman. PSG tan hian Fabián Ruiz chuan inkhel tan atanga minute rukna lekah hmahruaina goal a thun nghal.
Hma takah goal an thun vangin PSG an phur a, goal pawh an thun belh leh thuai. Ruiz goal thun atanga minute thum hnu lekah Ousmane Dembele chuan an goal hnihna a thun zui leh zat bawk. Season liam ta leh Fifa Club World Cup ah PSG an khel ṭha viau a, treble champion an ni. Treble champion an nih theih nan Dembele-an a thawhhlawk hle. PSG tan a khelh that em vangin Dembele hi Ballon d’Or dawng tura rinkai ber a ni mek a. Fifa club World Cup ah PSG an champion zui leh a nih chuan Dembele hian Ballon d’Or a dawng dawn tih a nem ngheh theih tawh hial ang.
Hma taka goal hnih an thun hnuin goal hmahruai thuntu Ruiz chuan minute 24 naah an goal thumna a thun zui leh a, 3-0 a hmahruai chungin chawlhlawk an hmang
Chawlhlawk hnu lamah PSG an khel ṭha chhunzawm. Real Madrid in an si phurh sut tum viau mah se an hlawhtling zo lova, goal an chhuah belh leh ta zawk. PSG tan hian Gonçalo Ramos chuan minute 87 naah an goal lina thunin an chakna a nem nghet a. Real Madrid chu 4-0 ngawta sawpin final an lut ta a ni.
Fifa Club World Cup final hi Pathianni zan khian Metlife Stadium ah khelh a ni dawn a. French club lian PSG leh English Club lian Chelsea te an inhmachhawn ang.

Comments (0)
Add Comment