PSG lakah Liverpool an tlawm nawn leh

Thawhlehni zan khan UEFA Champions League quarter-final thawhhnihna khelh a ni a. An mualah si hnih faia chak tawh Paris St-Germain chu Anfield-ah 2-0 bawkin an chak nawn leh a, phu takin semi-final an lut. Champions League-ah English club an ngam chhunzawm zel a, an hmaa ding apiang sam lam takin an thianfai nghauh nghauh a ni ber mai. Tunhnaiah Englsih club te ngam loh ber chu PSG hi an ni tlat a ni.
Liverpool hian mikhual an nihna hmun Parc de Princes-a an tlawm tawhna chhang letin an mual; Anfield-ah chak tumin tan an khawh nasa hle. Inkhel tan phat atangin mipui thawm tha tak nen an mikhualte an nawr nghal chat. Hma takah goal thun an tum laiin goal an chhuah nghal teuh viau thung. PSG hian fuh zetin mualneitu an nawr tlang a, hlauhawm an siam nghal Reds si nghak Giorgi Mamardashvili chuan a clear hman hram a, Liverpool an him hlauh. Ball kal zel hi Ousmane Dembélé chuan changin goal lamah a pet nghal pawp a, a pet goal teuh hle. Si nghak Mamardashvili chuan an team a chhanhim nawn leh thei hlauh a, goal an chhuah ta lo hlauh.
PSG in Liverpool an ngam laklawh a, an nawr bet deuh reng. Luis Enrique team te hian Liverpool tlarhnung an thiat nawn leh a. Ballon d’Or chawimawina kawl mek Ousmane Dembélé chuan goal thun theihna hun tha nei nawn leh mah se hnaite atangin goal chungah a petchhuak luah a, a hun tha neih a chhawr tangkai thei lo nawn leh.
An beh reng hnuin Liverpool in an khingpuite an nawr let a, Alexander Isak chuan a hun tha neih a chhawr tangkai thei lo phawt a. Hemi hnu hian goal an thun teuh hle a, goal an thun teuh hle. PSG captain Marquinho chuan goal line bul lawk atangin save pui zet a nei a, vanneihthlak takin PSG an him hram. Team hnihten goal thun an tum ngawrh bawka inkhel a hmuhnawm tak zet. An him hram hnuin PSG in Liverpool defender tihfuh tawk loh vangin goal thun theihna hun remchang an nei nawn leh a, defender Ibrahim Konate chuan a lo dang hman hlauh a, Liverpool an him nawn leh. Chawlhlawk hmain Dembele chuan goal thun theihna hun tha nei nawn leh bawk mah se a chhawr tangkai zo leh chuang lova, inkhel hmuhnawm takah goal lut a awm thei lova, goal awm lova inhnehtawk chungin chawlhlawk an hmang ta phawt rih.
Chawlhlawk hnu lamah inkhel a hmuhnawm leh zuala goal hnih a lut ta nge nge. Second half tir phatah Liverpool in an khingpuite an nawr tlang nghal a, Gody Gakpo chuan goal a thun teuh hle a, singak Mavey Safonov-a’n Gakpo pet kawh tak hi a lo dang hman hlauh. Reds hian na zetein an khingpuite an nawr zui reng a, hlauhawm siam mawlh mawlh mah se goal erawh an thun thei bik lo. An beh reng laiin PSG hian fuh zetin a nawr let thut a, goal an thun teuh viau naa a teuhah an la thamral ve tho bawk. Na taka an khingpuitete nawr rentu Liverpool in goal thun theihna hun remchang zawk an nei a, penalty an hmu. Goal an thun ngei turah ngaiin phur hman viau mah se VAR rawn a nih hnuin penalty an hmu leh ta chuang lova, Reds vanduai a kaltluang a ni ber mai.
Inkhel hmuhnawm takah goal lut a awm theih loh reng hnuin goal hmuh tur a awm ta nge nge a, goal thuntu chu PSG an ni. Fuh taka an khingpuite nawr tlang a, mawi taka ball an inpek kual hnuin box pawna awm Ousmane Dembélé chuan minute 72-naah fuh zetin lei hrulah a pet goal a, hmahruaina goal a thun. Anfield-ah goal thun hmasa zawk an nih leh tak vangin PSG hian si belhkhawmah 3-0 ngawtin hma an hruai tawh a, an ke dinglamin semi-final an lut a ni deuh der tawh.
Goal thun mamawh tak chunga goal an thun theih tlat loh vang leh goal chhuah zawka an tan leh tak zel vangin Liverpool an hnual tak zet tawh a, chu chu an game-ah a lang ta hial bawk. Hmahruaitu zawk PSG hian hun pek belh minute 90’+1-ah fuh zetin an khingpuite an nawr tlang nawn leh a. ’ na nih tuma inelna boruak a nung thar leh zual. Dembele chuan awlsam taka pet goal in, an goal hnihna a thun a. Si belhkhawmah 4-0 a chakin semi-final an lut ta a ni.
French Ligue 1 champion PSG hian champions League-ah English club an ngam hle. Season liam ta khan English club an hmachhawn zawng zawng an hneh vek a. Season kal meka last 16-ah Chelsea chu 6-0 ngawta sawpin an lo hnawtchhuak tawh a. Quarter-final ah english club zinga European competition a hnuhma nei tha ber Liverpool chu 4-0 ngawta sawpin an hnawtchhuak zui leh ta bawk.