PSU-in Assembly House-ah report
thehlut lo rei tih Committee-in hmu
Mizoram sawrkar hnuaia public sector undertaking ho chuan hun rei tak chhung State Legislative Assembly-ah report an thehluh tawh lo tih House Committee-in a hmuchhuak.
Assembly Session-ah 2nd Report of the Committee on Papers Laid on the Table chu an chairman Lt. Col. Clement Lalhmingthanga’n Ningani khan House-ah a pharh a, Commerce & Industries department kaihhnawih thil a ni.
Committee chairman chuan sawrkar department leh sawrkar endik leh hriatpui hi Legislative Assembly Session chhung chauha kalpui hman a ni loa, chumi atan chuan Assembly-in Rules of Procedure and Conduct of Business hmangin Committee hrang hrang Session lai leh Session loh laia thu khawm thei turin mawhphurna a hlan tih a sawi.
Assembly Committee hrang hrang zing ami, Committee on Papers Laid on the Table pawh hi ‘Accountability Committee’ zing ami pakhat a ni a. India danpui, dan siam leh a dang dangin dan anga House-a report rawn lay tur lay a nih leh nih loh zirchiang tur Committee a ni tih a sawi.
Report present takah pawh hian Committee on Papers Laid on the Table chuan Companies Act 2013 a zirchiang a, chuta a hmuh chhuah chu, sawrkar company (PSU) ten hun rei tak chhung he Assembly-ah hian report an rawn thehlut tawh lo tih hmuh a ni tih a sawi a ni.
Sawrkar sum hman a nih dan hi House-in a hriat a tul a, House dawhkana pharh a nih hian public domain-ah awmin, mipui hmuh theiha a awm thin angin, House dawhkana pharh tawh chu mipui tan hmuh theihin a awm tawh tih lantirna pakhat a ni tih mipui hriattir an duh tih a sawi bawk.
PSU-in Assembly House-ah report thehlut lo rei tih Committee-in hmu
