F. Lalremsiama
Chaltlang
Chawngkhum Dan Tlang huat loh Huang chhung atangin aw.
Pu A. Thanglura kha Mizo Tlangval B.A B.L hmasa ber a niin ka hria. State puitling Assam-ah Cabinet Minister ni hmasa ber a ni. Midang 1987-ah. Mizoramah Mizo Union a zawm hlim deuh lawk atanga Union Perhte kha, a hnu leh deuhah a Politik bul tanna Party ngei mai “Kawthuahsak” (purgation-a vau tu) tum ta bawk kha ka hmu pa vet vet thin hle mai. Mite pawhin a PA an ti ve tho!
Assam Legislative Assembly MLA-a thlan tlin a ni a. Cabinet Minister Capt. Sangma hnuaiah Parliamentary Secretary a ni a. Pu Lalmawia MLA pawh chutiang thoin, Tribal Affairs an enkawl. Pu Mawia te nena angkhat nih a duh lo. An ti CHIEF Parliamentary Secretary ta mai reng a ni.
Pu BP Chaliha, Chief Minister -in a Ministry reshuffle dawn hria khan Minister nih a phut ta a. Ani CM lah chuan ‘i la tuai (naupang) lu deuh’ a ti a ni awm e. Amah Pu Lura lah chuan, “Ka pu, i tawlailir hnuhpui turin sakawr putar nge i duh sakawr patuai thalai chak?” a ti let ve thak a. Mahse, a hnu deuh fet-ah Cabinet Minister-ah a kaisang ta tho. Assam kehdarh hma 1970 daih tawh khan.
Hetia a Minister hmaa Pu Lalmawia a nàu dan pakhat chauh: Pu Mawia Shillong atangin Mizoram fanga zin haw nen SILCHAR-ah an innang a, ani Pu Lura Zoram fang kual ve tur nen. Ani Pu Mawia Jeep thar chak leh tha zawk chu sawi set set loin a hmang ta hlauh a, a Station Wagon (car) chu Pu Mawia Shillong pan nan a hnutchhiah hmiah mai a. An pu Capt. Sangma a han phone lah chuan Pu Mawia chhanna dawn chu “I car/jeep lehzel engtin nge maw ka vensak theih ang che le” a lo ti daih an tih kha! Pui – nawi ve angreng!!
Suangpuilawn Bial Pu Vaivenga nen an inchuh tum khan, “Vaivenga, Vaihmite venga, chil lem thei tawk chauh” te a ti vel a. Amah Pu Lura chu a tla thum dawp leh si! A diau zui chuang lo.
A minister lai khan Pu ZD Sangliana kha a Private Secretary-ah a hmang a. An inti tawk hle. Ani ZD-a lah saptawng hmang nal thei ve tak mai kha, a pu (Minister) tawng ang tak tak khan tu tu te emaw a be kual thin niin a hria a. “ZD-a te hi tunge i biak leh tak? Ka hming hian Ramhuai te pawh in la hnawtchhuak dah rual ang e” a ti rawk mai. Ani ZD-a lah duai duh bik der si lo. “Hetia inrinhlelh reng mai, inhau fo mai, ka ning, ka bang e. Khawinge IAS exam nan Form ka han la nghal teh ang” ti chu ani Pu Lura’n a’n beizui leh ta hrep mai. An Grade IV Bahadura te, Kanchha te ko khawmin, “Hei ZD-a’n IAS ka exam dawn a ti. Nangni ho pawh in vaiin dilna form han la ula, IAS exam ve rawh u” a han tihkhum chu an hrethiam si lo, an hawihai nasa hle, an zawt ngam bawk si lo. An pui rep rep hle mai.
Assam hun lai khan MLA Seat 3 Mizoramin kan nei a. Aizawl East Biala Congress Candidate, Pu Zalawma Campaign-puia a thusawi dan te kha asin pa riap riap. “Amah Zalawma kan Candidate hi in iai a nih pawhin, Kei, A Thanglura, BA BL Advocate ka awm alawm. Pu CH CHHUNGA MLA lai pawhin a thusawi tur chu ka ziaksak vek alawm. Pu Zalawma pawh ka ziaksak leh mai dawn alawm” tih te hi amah ZD-a ngeiin, Lunglei Circuit House-a a sawi (Zualtea MNF Underground tur kan zawn laia Pu Chhunga te, Pu SR Vala te nena kan awmho laia) kan hlimpui viau mai te kha a ni. Pu Chhunga lah chuan, “Pu Lura kha a tha asin mawle; kan dah sâng hma lutuk alawm mawle” a ti lek fang a.
Tun tum kharna atan, a Martar em loh thu i hmang ang. Pu Laldenga ho Mizoram Independence sual kha a hlawhtling thei lo dawn chianga hriain, “In independent chuan, a Lawmnan min talh dawn nia!” a ti. PA BON TOP!
Assam ram pum British Sorkar kalsan anga la awm laia Mizo tlangval Cabinet Minister ni thei, Rajya Sabha MP hlui, Greater Mizoram lo aupuitu hmasa ber berte zing ami hian chanchin sawi tham fe fe a ngah. Ka la hre teuh, Mizorama Congress (INC) la luttu, a Ngawi dawha tla lian lian pawh Pu CH Chhunga te, Pu CH. Saprawnga te, Pu R. Dengthuama te maw le! A ngaihdan erawh kan tawmpui vek lem chuang lo.