PU College-in pass chhuakte
thlah pahin lur tharte lo lawm
Pachhunga University College chuan July 11 khan an College Multipur-pose Auditorium-ah zirlai tithate chawimawi leh zirlai lut tharte lawmna ‘Felicitation cum Fresher’s Social’ programme an hmang.
PU College hian kumin Mizoram University result chhuakah arts-ah 90.49% an pass a, science-ah 78.26%, commerce-ah 93.75% leh management 95.24% an pass a. University rank holder 116 leh gold medalist pathum an nei. Zirlai rank holder ho hnenah hian chawimawina leh lawmpuina an hlan a. Arts stream-a mark hmu sang ber Lalremsiama, Political Science department hnenah ‘HK Bawichhuaka Award’, sciene stream-a mark hmu sang ber Yerrabelli Dedeepya Reddy, Biotechnology department hnenah ‘Lenrualhlui Award’, management stream-a hmu sang ber Euniki Lalchhanhimi hnenah ‘Dr H Lallungmuana Award’, commerce stream-a hmu sang ber Lalremsiama hnenah ‘Khawtinkhuma Award’ an hlan. Award hian sumfai Rs. 10000, certificate leh trophy a kengtel a ni.
Hmanpuitu minister B Lalchhanzova chuan, lehkhathiam chu sawrkar hnathawhna atan chauh ni lo, sawrkar hnathawh lohna atan hlei hlei a tha tih sawiin, nasa zawka lehkha zir turin a fuih. “Eng thil pawh ti dawn ila, inbuatsaihna ‘input’ tha a pawimawh a, ‘input’ a that phawt chuan kan tih tur kha tha takin kan tih theih phah a, hnathawh rah chhuah ‘outcomes’ a tha ngei ngei thin,” a ti.
Zirlaite chu chhel leh tumruh tura fuihin, tumna a san chuan thawhrim a ngai nasa a, thawhrimna chuan result tha min pe thin tih a sawi. “Sum neih loh chuan a neih dan kan ngaihtuah mai thin a, harsatna hneh kan tum tur a ni,” a ti.
College principal Prof. H Lalthanzara chuan zirlai lut tharte lawmna thu leh pass chhuak tate lawmpuina thu a sawi a. PUC-ah hian science-ah zirlai 452, arts-ah 548, commerce-ah 67, management-ah 52, an vaiin 1219 lu thar an awm. Heng bakah hian III Semester-ah zirlai 854 leh V semester 817, an vaiin zirlai 2890 an awm mek.
PUC-ah hian department 23 awmin, post graduate zir theihna department 5-ah zirlai 100 vel bakah Ph.D scholars 60 chuang an awm a, an vaiin zirlai 3000 chuang leh zirtirtu nghet 120 chuang an awm mek bawk.
PU College-in pass chhuaktethlah pahin lur tharte lo lawm
