Pu Zoramthanga kaihhruai MNF sawrkar chu opposition pawh thliar lo, ‘huapzo sawrkar’ a ni tih MNF Thalai president Dr L Thangmawia chuan a sawi.
Thawhtannia MNF office, Mizo Hnam Runa inkhawmah MNF Thalai president chuan Pu Zoramthanga kaihruai sawrkar chu huapzo sawrkar a ni, tiin, Congress sawrkar hmasaka Land Use policy an kalpui chu opposition bial tan chuan beisei ngam a nih loh laiin, MNF sawrkar chuan ruling leh opposition bialah SEDP dawngtu tur inzat theuhin a ruahman a. Opposition bial pahnih – Tlabung leh Kawrtethawvengah RD Block hawn thar a ni ta bawk tih a sawi. Hei hian MNF sawrkarin hmasawnna hnathawh kawngah thliarbik neiloin a thawk thin tih a tihlan thu a sawi.
MNF sawrkar chuan sawrkar hmasa in a tih tawh, thiltha chu an chhunzawm zel laiin, thil tha lo zing ami sawrkar zu zawrh erawh an titawp mai tih a sawi bawk.
MNF chu Mizo hnam, kan sakhua leh kan ram a ral loh nana din a ni tih Dr L Thangmawia hian sawiin, “He principle hi kan zawm tlat chuan Pathianin min thlahthlam loang tih ka ring. MNF hi Pathianin Mizote tana a pek a ni a, a hruai pawh a hruai thin. Kan chapo dawn apiangin min hnukhniam a, party thenkhat chu a dintute la dam laiin hmuh leh hriat tur awm loa thi a awm nual. Miten min diriamin, min bei hle mah se, Pathianin he hnam tan hian min din tlat avangin min chawisan zel ka ring a ni,” a ti.
Tun atanga reiloteah Mizoramin kawngpui kan nei tha tawh dawn tih MNF Thalai hruaitu hian a sawi. Mi tam takin central scheme niin sawi thin mah se, central scheme a ni emaw ni lo emaw state sawrkar inrawlh loh leh chet lohin hna a kal thei lo tih a sawi a. Chief minister Pu Zoramthanga hmalakna Aizawl khawpui helna tur Aizawl by pass chu nghahhlelhawm a tih thu sawiin, Aizawl by pass road puitlin hunah Aizawl traffic jam hi 40% in a tihniam dawn nia a chhut thu a sawi a ni.