National Handloom Development Programme (NHDP) hnuaia Lengteng assembly bial huamchhunga puantahtute tanpuina chu Ningani khan bialtu MLA, Industries minister F Rodingliana’n a sem.
Kawlkulh Handloom Pocket leh Ngopa Handloom Pocket huamchhunga puantaha eizawng mi 48 leh Teikhang khua amite hnenah hlan a ni a. Kawlkulhah hian mi 27 leh Ngopaah mi 21 hnenah pek a ni. Puantah in sakna atan Rs. 120000 theuh an dawng anga, 1st installment ah Rs. 50000 an dawng phawt a ni.
Minister chuan tanpuina dawngtute chu hmathlir thui tak nei tur leh hmalakna an kalpui dan uluk taka chhut hmasa thin turin a fuih a. Hlawhtlinna lian zawk an chan theihnan mipui mamawh, duh zawng leh hralh nuam tur ngaihtuah tel tur leh, an kutchhuakten hmun zau zawk a thlen theihnan ruahmanna siam thin a pawimawh tih a sawi. A huhoa hmalakna sawt zawk kalpui thiama thawkho leh tangrual turin a fuih bawk.
Lengteng bialtu MLA hian Ngopa khuaa Police Sub-Division dahna tura ruahmanna awm chu police hotute nen Ngopa Chhimvengah an enho a. Hrianghmunah ama mimal sum atanga a lei bus chu Hrianghmun sikul naupangte tan a hlan a ni.
Puantah in sak tanpuina hlan
