Kum li liam taah khan Aizawl Municipal Corporation chuan Aizawl khawpui hi ‘plastic-free city’ ni turin a puang a. Khapna dan urhsun taka kenkawh a nih lai kha chuan polythene pawh a vang deuh duak a, a thlakna tur puan/lehkha/hnah etc. a lo chhuak nghal a, thenkhat tan eizawnna kawng a inhawng a. Secondhand puan hmangin bag etc siam a ni a, lehkha hmangin thil funna lehkha bag siam a ni a, biodegradable bag pawh a lar hman viau a nih kha. Mi tam takin bazar-a an kal dawnin an thil lei dahna tur bawm engemaw tal an pai chhuak a, polythene bag hman duhlohna rilru a lo piang chhuak ve nghal a.
Hun a lo kal zel a, a tir lama thuneituten urhsun taka dan an kenkawh ang kha a zuai telh telh a, chutih rualin khap chin polythene bag/plastic hman a hluar chho ve leh nghal a. Khapna dan chu a la awm reng a, mahse sumdawngten dan an bawhchhia a, dan bawhchhiate laka hremna dan lekkawh a nih tak mangloh avangin tunah phei chuan ‘khap’ a nih pawh hi kan hre ta mang lo hial awm e.
Nimin maiah AMC chuan Single Use Plastic (SUP) hman khap chhunzawm a nih thu mipui hriattirna a tichhuak leh a, khap chin item-te a tarlang leh a. Hman phal loh SUP te hi hmang/zuar/kawl te chu man an nih chuan dan hmangin pawisa chawitir thin a nih thu hriattirnaah tarlan a ni.
Plastic lam chi reng reng a that lohzia hi chu kan inhrilh ngun malh malh ta bawk a, kan hre bel viau tawh awm e. Thuneituten khapna dan an siam a, chu chu sumdawngte leh mipuite zawm tur a ni. Sumdawngte leh mipuite hian kan zawm tha lo tih chu fur tuihawkin kawmkara chheprelh bawlhhlawh hrang hrang a rawn khawrh chhuah zingah hian plastic lam chi chu a tam ber a la ni ta reng a ni.
Kan ram tana tha lo tih kan hriat reng pawh kan zawm duh lo a nih chuan a tuartu turte chu keimahni bawk hi kan ni. Mipui hian dan zawm hi i zir thar leh ila, dan kengkawhtute pawhin tha takin dan kengkawh bawk se. Ram changkang kan tihte changkan chhan chu dan kenkawh that leh dan zawm that vang a ni. Changkan kan duh chuan dan kenkawh that leh dan zawmthat a ni mai a, sum sen a ngai der si lo.
Public Sector Enterprise-te hi
