PUC-ah International Conference nei
Pachhunga University College Department of Environmental Science leh Society for AgroEnvironmental Sustainability Dehradun Uttarakhand tangdun huaihawt, ni hnih awh “International Conference on Recent Advances in Environmental Research, Biodiversity Conservation and Sustainable Development” chu Thawhlehni khan tan a ni.
A hawnna hmanpuitu PWD minister Vanlalhlana chuan, ramngaw leh nungcha tih chereu nasat avang leh sik leh sa inthlak danglam nasa avangin harsatna hrang hrangin khawvel a nghawng a ni mai loa, khawtlang nun, eizawnna leh thangthar zel turte tan a chhe zawnga nghawng tha lo nei thei a nih avangin, ram hmasawnna hna thawh leh environment humhalh chu inkhuangrual tak fimkhur taka kalpui a ngai tih a sawi.
Ram hmasawnna hna thawk tur chuan kawng laih, in lian tak tak leh infrastructure hrang hrang din a ngaih thin tih sawiin, “Chutiang tur chuan ramngaw, thing leh mauin an tuar chang a awm fo thin a; inkhuangrual taka development leh environmental conservation kalpui a nih zel theihnan zirlai leh researcher-te chu nasa lehzual zirbing a,
in thiamna leh theihna ram tana hmanga sawrkar thawhpuitu turin ka sawm a ni,” a ti.
Higher & Technical Education minister Dr Vanlalthlana pawhin, conference chhimtu zirlaite leh researcher-te chu an zirlai piahlamah ram leh hnam vei tura chahin, central schemes leh hmasawnna hna thawh danah thil nihna dik tak hrechiang a, dan bawhchhiatna awm thei lakah sawrkar venpuitu ni turin a chah tih a sawi a ni.
International Conference hi online leh offline mode-a kalpui niin, Mizoram bakah ram pawn atangin zirlai leh mithiamten Environment, Biodiversity leh Sustainable Development chungchanga thupui thlanchhuah hmangin thusawi leh zawhna awmte chhan a ni ang.
PUC-ah International Conference nei
