Carles Puigdemont, ex-Catalan leader ram danga tlanchhia chu Spain lutin police tena nasa taka man tuma an hual laiin him takin a tlanchhuak thei thung.
Spanish thuneitute chuan Ningani khan Puigdemont an Spain a lut tih hriain man tumin an hual nasa hle a, Barcelona-ah thu tawite a sawi hnuah a bibo zui nghal a ni.
Kum 61 a upa ni tawhin kum 2017 atang khan Spain atanga Catalan independence a ngiat avangin thubuai nei reng a ni a.
Darkar 24 chhung vel zet Spain a biboa a awm hnuah Puigdemont chuan a chen mekna Belgium chu him takin a thleng tiin party secretary general Jordi Turull chuan a sawi.
Kum 2017 khan Catalonia pro-independence leader Puigdemont te chuan referendum an buatsaih a, chu referendum chu Spain constitutional court chuan dan kalh a tihsak hnuah Catalonia region independence an puang zui a ni.
Madrid chuan Catalonia region chu a awp zui nghal a, Puigdemont chu Belgium ah tlanchhe zui nghalin Brussels ah a hun tam zawk a hmang a ni.
Kum sarih hnua Spain a let leh hmasak berah Barcelona a Catalan parliament a mi tam tak pungkhawm hmaah thusawina a nei a.
“Catalonia dam reng rawh se” tia auin Spain a letlehna chhan chu ‘kan la awm reng a nia’ tih lantirna tiin a sawi a.
“Referendum huaihawt hi dan kalh a ni lo va, a ni ngai lovang” tiin Puigdemont chuan sawi bawkin mipui hmuh laiin a bibo zui ta nghal a ni.
Turull chuan ex-Catalan leader chuan Brussels a thleng tawh tih a chian thu sawiin mahse a chenna hmun tak Waterloo municipality a thleng tawh em tih erawh a chian loh thu a sawi thung.
Party secretary general chuan Puigdemont chu Thawhlehni atang khan Barcelona ah a awm tawh thu sawiin Ningani khan Barcelona parliament ah a inlan hlawl a ni a ti.
Turull chuan Puigdemont chuan Thawhleh zanah Barcelona ah dinner eiin Nilaini leh Ningani pawh Barcelona ah nilengin hun a hmang a ti bawk a.
Puigdemont Barcelona-ah a awm tih hriat a nih veleh police te chuan man tumin chet an la nghal a. France nena inrina La Jongquera a lirtheite chu police ten an enfiah nasa hle.
Catalonia police te Mossos d’Esquadra te chu Spanish Supreme Court judge chuan eng vangin nge Puigdemont chuan Barcelona a chhuahsan theih tiin chhanna pe turin a ti zui nghal bawk a.
Judge Pable Llarena, Puigdemont man tura thupek chhuahtu chuan Spain interior ministry chu engtiangin nge man an tum tiin thu a zawt bawk.
Justice Minister Felix Bolanos chuan Puigdemont zawn chu Mossos’ te mawhphurhna a ni a, Catalonia a dan leh hrai lek kawh tute an ni a ti.
Puigdemont tlanchhuahna car chu police officer ta tia sawi niin mahse police te chuan Puigdemont nena inhnamhnawihna an nei lo tiin an sawi ve thung.
Puigdemont man lohin chhuah
