Puitu a zawn thiam chuan sawrkar hma hun a eng thei
– Lalrinliana Sailo
Mizoram sawrkarin puitu a mamawh a, puitu tur a zawn thiam a, inngaitlawm taka hma a lak chuan Mizoram hmalam hun a eng ve theiin a rinawm tih State BJP hruaitu Lalrinliana Sailo chuan a sawi.
Thawhtannia an party office-a inkhawmah BJP State Core Group member Lalrinliana Sailo chuan Mizorama political party hrang hrang awmten Pathian ringtu kan nih angin politics thianghlim khelh a ngai tih a sawi a. Politics chu party inbeihna atan maia hmang loin, ram chanchintha thlenna hmanrua atan leh mipui hamhatna thlenna hmanrua atana kalkawng a ni a tih hriat a pawimawh, tiin, “Midang chhiatna lai ringawt zawng loin, rinthu nena midangte diklo taka inpuh phei chu sual lian tak a ni a, kan sim a hun tawh,” a ti.
Politics-ah thawhhona tha, inkaihhruaina tha a pawimawh a, chumi atang lo chuan hlawhtlinna a awm thei thin lo tih BJP hruaitu hian a sawi a. Sawrkar kal mekin 15th Finance Commission a hman avangin state thawhchhuah mumal nei lo, central ringa nung ve chang chang ta chu kan dinhmun a tha lo hle tih a sawi.
“Mizoram sawrkar hian puitu a ngai a, amah mai chuan inhaichhuah ngaihna a nei dawn lo. Puitu a mamawh a, puitu tur a zawn thiam a, inngaitlawm taka hma a lak chuan Mizoram hmalam hun a eng ve theiin a rinawm,” Lalrinliana Sailo hian a ti. Chutihrualin chapona chuan chhiatna a thlen thin a, dinhmun sang kan din chiahin kan nihna a lo langfiah thin a, chapo mai a hlauhawm hle tih a sawi.
“Mizoram kan kaihhruaina kawngah hian chapona nen niloa, inngaihtlawmna nen ram kan kaihhruai a, Pathian duh dana hma kan la a nih ngat chuan, kan ram, kan hnam hian malsawmna kan dawng ngei dawn a ni,” a ti.
Puitu a zawn thiam chuan sawrkar hma hun a eng thei – Lalrinliana Sailo
