Puitu pawl 100 chuangin Gaza-ah tampui mitthi a thleng dawn an ti

Puitu pawl 100 chuangin Gaza-ah tampui mitthi a thleng dawn an ti
Khawvel huap mi tanpuitu leh mihring dikna chanvo humhalhtu pawl 100 chuangin Gaza-ah tampui mitthi a thleng dawn nia sawiin sorkarte chu rang taka che chhuak turin an nawr.
Médecins Sans Frontières (MSF), Save the Children leh Oxfam te pawh thuchhuah intawm siamtu zingah telin an thawhpui leh an miten an lo chawmna chu ‘engmah lovah a chang dawn’ tih an sawi.
Gaza luhna zawng zawng thununtu, Israel chuan heng pawlte thuchhuah hi hnawlin ‘Hamas ngaihdan an puang’ niin an sawi.
Tanpuitu pawlten thuchhuah intawm an siam mek lai hian Gaza-a Hamas enkawl health ministry chuan darkar 24 liam ta chhungin ei tur kham neih loh vangin Palestinian 10 an thi leh tih an sawi a, heng mite nen hian Pathianni atanga hetianga thi hi 43 an tling ta.
UN chuan mi tam takin ei tur an neih loh avanga chauvin damdawi an pan a, thenkhat chu khawlaiah an tlu tawp tawp tih an sawi.
“Israeli sorkarin Gaza mipuite chu tamin a hrek a, tanpuituten thih hlau reng reng chungin an hna an thawk hram hram a ni,” tiin pawl 109-in Nilaini khan thu an chhuah.
“Thil lut a tlem telh telh a, puitu pawlte leh an thawhpuite mit hmuh laiin an liam zel a ni,” an ti.
Thla hnih inkahhai an puan a tawp rualin Israel hian Match thla tir atang khan Gaza-a puihna lut zawng zawng dangin chawlhkar hnih hnuah sipai chakna hmangin Hamas an bei zui leh a. Helho hi an mi hrente an chhuah ngei theih nana nawr nan hetiang hian an ti tih an sawi.
Khawvelin tam a tla mai dawn tia an nawr nasat avangin thla hnih dawn hnuah an kawng dan hi an hawng hret chauh.
“Doctor-ten kham ei tur hmu lo, a bikin naupang leh upaah an tam zual tih an sawi a. Tui atanga kai natna a darh a, bazar a ruak a, bawlhhlawh hlir a ni a, puitlingte pawh riltam leh tuihalin khawlaiah an tlu tawp tawp a ni,” tiin puitu pawlte hian an sawi.
“Tanpuituten an rilru hrehawm an hnem pawhin naupang thenkhat chuan an nu leh pate hnenah vanramah chuan ei tur a awm dawn avangin vanrama kal an duh thu an hrilh thin,” an ti.
World Health Organization chuan mipui hmun lia thena hmun khat chuan tam an tuar mek a, hmeichhia leh naupang 1,00,000 dawn ei tur kham nei lo leh enkawl ngaiin an awm tih an sawi.
Thil phurh luh a awm mumal loh avangin thil man a to va, lei thei an awm mang lo bawk.
Puitu pawl hian UN chhinchhiah dan chuan sawisel hlawh tak, Israel leh US puih Gaza Humanitarian Foundation (GHF)-in ei tur sem hna an thawh tan tuk, May 27 atang khan ei tur an semna hmuna ei tur lak tum Palestinian 1,050 zet Israeli sipaiten an that tawh niin an sawi bawk.
Israeli sipaite erawh chuan GHF thil semna hmuna sipai an dahte hian mi tihthaih nan chauh silai an hmet puak niin an sawi a, GHF pawhin UN hian Gaza health ministry atangin ‘thu dik tawk lo’ an dawng niin an sawi bawk.
Puitu pawl hian Gaza mipui zawng zawng deuhthaw an in leh lo chhuahsanin an awm a, Israeli sipaiten an luah loh chu 12% chauh a ni tawh niin an sawi a. Puihna thil pawh ni khatah lorry phur 28 chauh a lut niin an sawi.
UN chuan Israel-in thuneihna a chelh dan hi khawvel dan bawhchhiatna a ni a, puihna pawh a mi chengte mamawh khawp a lut tur a ni tih an sawi.
Israel erawh chuan dan bawhchhiat an nei lo va, puihna an luhtir pawh Hamas kut a thlen loh nana khuahkhirh an ni tih an sawi.
Israeli sipaite hian October 7-a Gaza-a Hamas-ten an ram beia mi 1,200 chuang an thah leh hren tura mi 251 an hruai phuba lain Gaza hi an bei a. Mi 59,219 an thi tawh.