Sawrkarin a duh phawt chuan pung awm loin loan a pe thei a, guarantor-ah a thei tih ZPM leader Lalduhoma chuan a sawi a. An policy-ah tih hlawhtlin theih loh leh mipui bum tumna a awm lo tih a sawi.
Thawhtannia an party office-a inkhawmah ZPM leader chuan sawrkarin a duh chuan pung awm lo loan hi a pe thei a, guarantor-ah a tang thei tih a sawi a. Sawrkar laipuiin state tinah pung awm lo SASCI loan a pe a, MNF sawrkar hmasa pawhin a pung awm loin sawhthing loan a pe a, an ngaidam zui ta nghe nghe, tih te a sawi. Chutihrualin, ZPM chuan pung awm lo loan an zuar ngai loa, subsidy leh quarantor nei chi te erawh an zuar tih sawiin, “Kan policy-ah tih hlawhtlin theih loh leh mipui bum tumna a awm lo,” a ti.
Party pakhatin ZPM policy chungchangah loan puk leh thildangah tih theih loh pui intiama mipui bum tumah an puh tih Lalduhoma hian a sawi a. A tih theih zia leh an budget ei hek si loa tih dan, rethei dawmchhuahna tur – hand holding policy tihpuitlin nan hman an tum tih a sawi.
“Loan chungchangah Ministry of MSME-in Micro Small and Midium Enterprise Development Act 2006 a siam tawh a, he dan hian enterpreneur tenau tete leh a lawihawlten loan an lak theih nan ruahmanna tha tak a siam. Kumin April atang phei chuan loan lak theih zat hi nuai 500 thlengin a tipung tawh a. He dan hnuaiah hian scheme hrang hrang a awm a, kan tangkaipui zual tura ngaih, a tlangpui ringawt pawh dinchhuahna tham tur hlir a ni,” a ti. Scheduled caste leh scheduled tribe-te pual bikin NSSH scheme a siam a, NSSH hian a hnuaia public undertaking a neih National Industries Corporation kaltlangin, a vaia rulh ngai lo turte in loan a pe thin tih a sawi bawk.
Pung awm loin sawrkarin loan a pe thei – ZPM leader
