Ludhiana, Punjab a cheng, hmeichhe naupang kum 11 mi chuan a sam tawn pawng laiin hula-hoop tivir theiin, Guinness Word Record a siam. Second 30 chhungin vawi 86 a tivir hman a, Guinness World Records, second 30 chhunga sam tawn pawng hmanga hula-hoop tivir hnem thei ber record a ni.
He hmeichhe naupang hi a hming chu Praneet Kaur a ni (Mizo hmeichhe hming tawpa ‘i’ awm thin ang hian Punjabi hmeichhia te hi ‘Kaur’ an ni ve thung) a, March ni 24 khan Ludhiana-ah record hi a siam a, Guinness lamin a record an pawmpuina hi tunah an tichhuak ta a ni.
Punjabi te chuan an chhipah an sam an tawn khawm thin a, Praneet pawh hian a sam tawn khawm hmangin hula-hoop hi a tivir thei a ni. Hula-hoop chu thil bial lian deuh tak a ni a, hmeichhia ten an kawng bawrah te dahin an taksa tisiksawiin an tivir thin. Praneet pawh hian a lu a tihchet zawngin a chhip-a hula-hoop chu a tivir chai chai mai a, second 30 chhungin vawi 86 a tivir hman a ni.
A hmaa hetiang record chu Chennai, Tamil Nadu a cheng, Vaishnavi Shree siam niin, December ni 13, 2023 khan a sam tawn khawmah second 30 chhungin hula-hoop vawi 61 a tivir thei a, he record hi vawi 25-in Praneet hian a rawn khum ta a ni.
Praneet chuan, “Naupangtê ka nih lai atangin engtikah emaw chuan mite hriathlawh ni ve ngei ka tum thin a. Mahse, ka rin aia hmain, kum 11-ah chutiang nih theihna remchang chu ka hmu ta a ni. Kan school-a gymnastic zirtirtuin Guinness World Records siam tum tura min fuihnain min tiphur a, chu chu a lo thleng ta a ni,” a ti.
Praneet hi hmeichhe naupang kum 7 mi chauh a nih lai atangin hula hooping a tuipui tawh a, online-a hula hoop an tivir lai a hmu a, chuta tang chuan phurpuiin virtual class te zawm ta hial a. A tirah chuan a bul thut, kawng leh kut vela tivir zirin bul a tan a, a rei telh telh a, a thiam tawlh tawlh a, an school-a gymnastic class a zawm hnuah phei chuan hula hoop trick eng eng emaw te pawh ama tawkin a zirchuak ve ta zel a ni.
Praneet hian Guinness World Record dang pawh siam leh tumin a inzir mek a, chu chu sam tawn hmanga minute khata hula hoop tivir hnem thei ber record a ni. Tuna hetiang record dinglai chu Jaimino Prasant Soni’n December ni 1, 2023-a a siam niin, minute khatah vawi 153 a tivir hman.
Punjabi hmeichhe naupangin hula-hoop record a siam
