‘Pushpa 2: The Rule’-in record a siam
South Indian film thar ‘Pushpa 2: The Rule’ chu a hit hle a, an tlangzarh ni-ah cinema hall ticket hralhna atangin khawvel huapin cheng vaibelchhe 294 a la lut thei a, a ni hnihna a zawh meuh chuan cheng vaibelchhe 449 a la lut der tawh a, ni thum a ral hmain cheng vaibelchhe 500 a la lut thei a, Indian film zinga cinema hall ticket hralhna atanga cheng vaibelchhe 500 la lut rang thei ber record a siam a, Indian film zinga ni thum chhunga hetiang zat la lut thei awm chhun a la ni bawk.
He film hi December ni 5-a an tlangzarh kha niin, December ni 4-ah paid premiere show, Andhra Prades, Telangana leh Bengaluru-ah te neiin, hetah hian cheng vaibelchhe 10.1 a la lut hman bawk. December ni 7 (Inrinni)-ah cinema hall ticket hralhna atangin cheng vaibelchhe 115 la lut theiin, a ni khatna sum lak luhah pawh RRR, Baahubali 2 leh KGF 2 te pawh a khum hial a ni. An tlangzarh atanga Inrinni hmasa berah a Hindi version pawhin cheng vaibelchhe 73 la lut theiin, hei hian Shah Rukh Khan-a ‘Jawan’, a Inrinni vawi khatnaa cheng vaibelchhe 71.63 la lut thei a rawn khum thei tlat bawk.
‘Pushpa 2: The Rule’ hi Allu Arjun, Rashmika Mandanna leh Fahadh Faasil te channa niin, Sukumar direct niin, nitin inhlawhfa chawpa eizawng thin, smuggling lama hlawhtling ta em em mai chanchin tarlanna a ni.
A film hmasa zawk ‘Pushpa: The Rise’ chu 2021-a tlangzarh kha niin, cheng vaibelchhe 300 vel a la lut thei a, mahse, a film pahnihna hi chuan a hmasa zawk sum lak luh hi ni thum chhung lekin a rawn khum nghal a, Pathianni-a cinema hall ticket hralh leh nen chuan Pushpa 2 hian cheng vaibelchhe 750 a la lut tling hman tawh dawn niin an chhut a, India bika a sum lak luh chu cheng vaibelchhe 270 vel a ni ang.
‘Pushpa 2: The Rule’-in record a siam
