South Indian film, Ningani kaltaa an tlangzarh ‘Pushpa 2: The Rule’ chuan sum a la lut chak ham ham hle a, khawvel huapin cinema hall ticket hralhna atangin cheng vaibelchhe 800 a la lut nghal der mai a, India bika a lak luh chu cheng vaibelchhe 536.44 a ni.
Allu Arjun leh Rashmika Mandanna te channa ‘Pushpa 2: The Rule’ hi 2021-a an tlangzarh ‘Pushpa: The Rise’ chhunzawmna a ni a, Telegu, Tamil leh Malayalam bakah Hindi version a awm, Telegu hi a sum hmuhna lian ber a ni.
He film hi US-ah pawh a chetha hle a, opening weekend-ah nithum chhungin dollar maktaduai 4.8 la lut theiin, North American box office-ah No.4 a ni a, US-ah hian Zirtawpni hmalama a sum lak luh tawh nen chuan dollar maktaduai 9 a la lut tling tawh bawk.
He film-ah hian Allu Arjun chu red sandalwood smuggler Pushpa Raj lemah a chang a, smuggling lamah a hlawhtlin dan leh a elpui leh a hmelma ten tihchhiat an tum dan te tarlanna film a ni.
Pushpa 2: The Rule hi ram hrang hrang 38-ah tihchhuah a ni a, khawvel huapin cheng vaibelchhe 800 la lut tawhin, Thawhtanni-ah cheng vaibelchhe 70 vel la lut leh man tura chhut a ni bawk. He film hian ni nga chhung lekin kumina Indian film sum la lut hnem ber nihna a hauh pha der tawh a, ‘Kalki 2898 AD’ a rawn khum nghal a ni.
Pushpa 2: The Rule-in vbc 800 la lut tawh
