Russian President Vladimir Putin chuan Ukrainian sabotage group te chuan Russian border region lutin civlian te silaia kapin firfiak takin an che tiin a sawi.
Bryansk region governor chuan Ukrainian sipaite chuan Lyubechane a civilian car an kap a, mi pahnih kaphlumin kum 10 mi lekin hliam a tuar a ti bawk a. Kyiv chuan Russia thusawi hi a hnawl thung a, he thil thleng nia sawi hi finfiahin a awm lo thung.
Volodymyr Zelensky adviser Mykhaylo Podolyak chuan, “Russia hian a mipuite ngei chu hlauhlawpa siam a tum a, hei hi ram dang a runa amah a inthiam nana a hmalakna a ni,” tiin a sawi.
A hma pawhin Russia chuan Ukrainian missile leh drone te chuan Russian border area an bei a lo titawh bawk a. Mahse, Ukrainian sipai tena Russia ram an luh emaw finfiahna engmah a awm lo thung.
Russia’s Federal Security Service (FSB) te chuan Russian sipai te leh ‘Ukrainian nationalists’ te Russia ram luta mi thenkhat hruaibo tum te nen an inkap tiin a sawi a.
FSB te chuan Ukrainian nationalists te hi Russian laipui hmanga beih niin Ukraine ram lamah nawr letin an awm tiin a sawi a, heng Ukrainian sipaite hian ralthuam thahnem tak an kalsan tiin FSB te chuan an tarlang bawk.
Russia-in February 2022-a Ukraine a run khan President Putin chuan Kyiv sorkar chu ‘nationalists’ leh ‘neo-Nazis’ tia sawiin Russia chuan a do lo thei lo, a ti a.
Ukrainian president Zelensky erawh Ukraine-a democratic hmanga thlan tlin niin Jewish thlah a ni a, a sorkar chuan far-right politician a nei miah lo thung.
Russian state TV-a thusawina a neihah President Putin chuan, “Firfiak taka che lehin pawi an khawih leh a, rami kanin civilian te lakah silai an hmet puak a ni,” a ti a.
“Civilian car a ni tih hre reng leh a chhungah naupang an chuang tih hre rengin an kap lui a. Heng mite hi historical memory-te hnualsuata nuaibo duhtute an ni a. Engahmah an hlawhtling lo ang a, kan nawr tawm vek ang,” tiin a sawi zui a ni.
Russia-ah chuan online video pakhat Ukraine-based Russian Volunteer Corps (RVC) member pakhat chetvelna tihlan a ni a. Ralthuam keng mi pakhat chuan Telegram-ah Russia ram an lut tia a sawina chu pholangin chu chu Russia-ah thehdarh zui a ni.
Investigative journalism group Bellingcat Monitoring te chuan RVC te hi ‘nikuma indin anti-Putin, anti-Kremlin Russian far-right figures Ukraine a chetla te’ tiin a sawi thung a.
“Heng RVC te hian indona tak tak an hmachhawn lo va, military background nei pawh an awm lo,” tiin Bellingat expert, Michael Colborne chuan a sawi a. Video tihlana mi pakhat chu RVC leader Denis Kapustin niin hming lem Nikitin tih a hmang a ti bawk a.
RV te chuan video an post zuiah ‘Bryansk region kan lut a, kan ram mite hnenah beiseina a awm tih leh Russian ralthuam kengte chuan Russian sorkar kan bei let thei tih kan lantir a ni’ tiin a sawi.
RVC te chungchangah Ukrainian military intelligence official Andriy Yusov chuan, “Heng mite hi ralthuam kenga Putin sorkar leh amah thlawptute beitute an ni a. Russia hi a thanharh a hun ta a, eng emaw chu a tih a ngai ta,” tiin a sawi.
Tunkar tir lamah Putin chuan Ukraine leh Western spy te chu Russia ram chhunga nasa zawka chetlaah a puh a. Russian officials te chuan Moscow atanga 100km leka hla Kolomna a drone tla pawh Ukrainian ta a ni lo tiin an sawi bawk.
A hma pawhin Russia chuan southern Russia-a an airbase chu drone hmanga beih a ni an lo ti tawh a, Kyiv erawhin drone hmangin Russia ram chhung beih a nei lo ti thungin Kremlin chu propaganda aupuiah a puh thung.
Putin-an civilian te beiah Ukraine puh
![](https://theaizawlpost.org/wp-content/uploads/tap_logo-min-large.jpg)