Putin-a’n inkahhai tha ti, hmabak erawh la tamah ngai

Russian President Vladimir Putin chuan Ukraine-a inkahhai kalpui tura ngaihdan awm chu a pawmpui tih a sawi a; mahse, eng ang inkahhaina nge ni dawn tih chu a zawhna a la ni rih.
Russian president hian kar tir lama Ukraine leh US inbiak tuma ni 30 inkahhai an rawtna leh Kyiv pawhin a pawm chungchang a sawi.
Moscow-a hian Ningania thuthar lakhawmtute a kawmnaah Putin-a chuan, “Inkahhai awmtir tumna hi a tha a, kan thlawp a; mahse, la sawiho ngai a la awm,” a ti.
Inkahhai chuan ‘muanna daih rei zawk leh buaina intanna a chin fel a ngaih thu’ a sawi bawk.
“Kan American thiante leh thawhpuite pawh kan la biak a ngai,” a ti a. “Donald Trump-a pawh ka be mai thei,” a ti.
Putin-a chuan, “Ukrainian tan chuan inkahhai ni 30 kalpui hi a hlawk dawn a. Keini pawhin tha kan ti a, thil ken tel erawh a la nei,” a ti.
Thil buaithlak tak pakhat chu nikuma Ukraine-in a beih chiam, Russia-a Kursk region chungchang chu a nih thu Putin-a chuan a sawi a. Russia chuan Kursk chu thunun vek an la duh a, Ukrainian sipai an la awm niin a sawi.
“Chhuah an tum a; mahse, kan thunun vek si a, an hmanruate pawh an kalsan a. Kursk-ah hian Ukrainian-te tan duhthlan tur pahnih a awm a – inpek emaw, thih emaw a ni mai,” a ti.
Ni 30 inkah chawlh tur chu eng angin nge hman a nih dawn tih chungchangah Putin-a chuan, “Ukraine insiksak nan em ni? An inralthuam that leh nan zawk em ni? Nge eng atan mah ni lo tur zawk? Chubakah chuan engtin nge kan tih ang?” a ti.
“Tu nge inkap lo tura thu pe dawn? Engnge a nghawng tur? Thil tam tak ngaihtuah ngai ala awm a ni,” a ti.
Putin-a’n thu a neih hnuah Zelensky-a chuan ram pahnih ngaihdan a phir tih a sawi zui ve nghal.
Ukraine hian thawh hnihin, rang taka inkahhai nghala rei zawk daih tura inbiak a duh.
Putin-a thu sawi hnu lawkah hian White House-ah pawh Trump-a chuan Russian hruaitu hi hmuh a châk reng tih a sawi a, Russia chuan ‘thil dik’ a tih ngei a ring a, ni 30 inkahhai pawh a pawm a beisei tih a sawi.
Putin-a hi US special envoy Steve Witkoff-a’n Moscow-ah a dawr ve mek bawk.
Russia hian February, 2022 atang khan Ukraine hi beiin an ram 20% chuang a chhuhsak tawh a. Indonaah hian Russian sipai 95,000 chuang an thi tawh bawk.
Ukraine-in sipai thi zat an tihchhuah hnuhnung ber, December, 2024 khan President Zelensky-a chuan 43,000 an thi tih a sawi a. Khawthlang ramte erawh chuan a aia tam a nih an ring.