Putin-a’n Ukraine nena indo a tawp hnaih ring

Putin-a’n Ukraine nena indo a tawp hnaih ring
Russian President Vladimir Putin-a chuan Russia leh Ukraine buaina chu a tawp hnai mai thei niin a sawi.
Inrinnia Moscow-a Victory Day military parade-a thu a sawinaah, “He thil hi a tawp dawn niin ka hria,” a ti a. Ukraine-a ‘special military operation’ chungchang sawiin khawthlang ramten Kyiv an thlawpna a dem thu a sawi.
Indopui II-naa Soviet-in hnehna an channa champha pual parade-ah hian tank leh missile-te pho lan thin ang kha a awm lo va, thuneituten Ukraine-in Red Square a beih mai theih an hlau a ni.
US hmalaknaa inkahhai kalpui chuan hlauhawm tiziaawmin parade-ah pawh thil thleng a awm lo va; mahse, a hnuah Ukraine leh Russia hian ni thum chhung awh tur inkahhai bawhchhiaah an inpuh ve ve.
Putin-a thusawi hi kum tin Victory Day-a a sawi thin, indona sawina atana a hman hnu darkar tlem têa a sawi a ni.
A thusawiah hian Russia chuan indona ‘dik’ a bei tih a sawi a, Ukraine chu ‘thapui na tak’ a nih thu a sawi a, “Nato bloc pum puiin ralthuam an keng a, an thlawp,” a ti.
A hnua thuthar lakhawmtute a kawmnaah khawthlang ramten Ukraine an puih chungchang zawhna chhangin Putin-a chuan, “Tanpuina an tiam a, chumi hnuah Russia nena buaina a chak tan nghal a, tun thlengin a la awm reng a. He thil hi a tawp dawn niin ka hria a; mahse, thil pawi tak a ni,” a ti.
Russian sipaite hian kum 2014 khan Crimea leh Ukraine khawchhak lam hmun thenkhat an la a, hemi hnu hian February, 2022 khan Ukraine chu an bei leh.
Putin-a chuan Ukrainian President Volodymyr Zelensky-a chu remna thuthlung nghet tak siam tura an inrem hnuah chauh a hmu dawn tih a sawi.
Putin-a chuan Europe venhimna atana ruahmanna thar siam a duh thu a sawi a, inbiakna neihpui tura a duh ber chu Germany chancellor hlui, Gerhard Schröder-a a nih tur thu a sawi bawk.
Kar hmasa khan European Council President António Costa chuan EU-in Russia nena inbiakna neih theihna tur a awm a rin thu a sawi a, Zelensky-a chuan hetiang thil hi a duh thu a sawi bawk.
Kar tawp khan US kaihhruaiin inkahhai thuthlung an siamah Kyiv leh Moscow chuan tang 1,000 inthleng an remti a; mahse, Putin-a chuan Inrinni khan Russia chuan Ukraine atangin inthlengna engmah a la hre lo tih a sawi.
Pathianni khan Russia chuan Ukraine chu inkahhai bawhchhiaah a puh a – heng zingah hian drone 6,000 chuang beih leh laipui hmanga beihpui thlakna za tam tak a tel a. Ukraine chuan Kharkiv, Dnipropetrovsk leh Zaporizhzhia biala Russian drone hmanga beihpui thlakna avangin mi eng emaw zat hliam an tuar tih a tar lang.
Kum 20 dawn chhunga a vawi khat nan Red Square parade-ah hian sipai hmanrua pho chhuah a ni lo va, he hun hi Kremlin hian khawvel hmuna a sipai chakna pho lanna atana a hman thin a ni.