PWD engineer-ten an kaisanna lam aiin kawng tha neih dan tuipui tawh – Chief minister

PWD engineer-ten an kaisanna lam
aiin kawng tha neih dan tuipui tawh
– Chief minister
PWD engineer-te chuan an kaisanna tur lam aiin engtin nge kawng tha kan siam theih ang, tih lamah ngaihtuahna an seng chho nasa ta zel tih chief minister Lalduhoma chuan a sawi.
Thawhlehni khan Mizoram PWD hotute chu chief minister Lalduhoma hoin an infuihthar a. Chief minister chuan ZPM sawrkar hnuah PWD-in hmel thar a hmu chho zel chu lawmawm a tih thu sawiin, engineer-ten an promotion tur aia ‘engtin nge kawng tha kan siam ang’ tih ngaihtuahna an seng chho ta zel chu kalphung thar mipui sawrkar hnuaia danglamna hmuh tur awm a ni tih a sawi.
“Engineer hna hi ram rawngbawlna hna ropui tak a ni a, mimal eizawnna a nih bakah ram tana thil tha leh rohlu hnutchhiah kawngah a taka thawktute in ni. In lakah mipuiin beisei kan nei sang hle a. Ram changkang tehna pawh engineer-te kutchhuakah a innghat thui hle. Chuvangin thahnemngai taka thawk zel turin ka chah che u a ni,” a ti.
Hmun thenkhatah hmasawnna hna kal lai mek leh a nih tur ang a nih hmaa eptu party lamin sawrkar beihna atana an hmang thin chu pawi a tih thu chief minister hian a sawi a. Mi hna zawhfel hmaa politics inbeihna atana hman chu politics ramhlui zia a ni, tiin, mipui pawhin hetianga sawrkar tihmualpho tumtute chu ngaihdan tawk kan thiam a tul hle tih a sawi. Chutihrualain kalphung thar mipui sawrkar hnuaia hnathawh reng reng a tha bik tur a ni tih sawiin, hna tha tawk lo chu State Monitoring Committee-in a umzui zel dawn tih a sawi a ni.
PWD minister Vanlalhlana pawhin hun kal tawhah PWD chu mi tam takin corruption tamna department-ah an ngai a, he department enkawltu leh a thawktute pawh mipuiin hmuh dan dang deuh an nei thin kha pawi an tih thu a sawi. “Kalphung thar mipui sawrkarah chuan chu ngaihdan chu thlakthleng turin a takin hma kan la a, mipui nena inngheng tlat department kan nih avangin kan hna chhiat leh thatah fak leh sel kan hlawh hma bik a, chuvangin he department-ah hian kalphung thar a thlen theihnan thawktu zawng zawngin thahnemngai taka hma kan lak a tul hle,” a ti.
PWD engineer -in- chief C Lalsangliana chuan ZPM sawrkarin PWD a enkawl mek danah an lawmin engineer-ten beiseina thar an nei lian hle tih a sawi. Engineer-ten hna thawk tha lo leh thiam lo ang lek leka sawi an hlawh thin leh, PWD an hmingchhe fo thin chu hrehawm an ti a, tunah chuan sawrkar thar, hna tha taka thawh duh a lo piang ta tiin, PWD-in hmingthatna an khum leh thei turah an ngai tih a sawi a ni.