PWD hnathawh thlirlet pui
Public Works Department Mizoram hnathawh leh hmalakna bakah hmachhawp sawiin Thawhlehni khan chief minister Lalduhoma hoa thutkhawm a ni.
Chief minister chuan thil dik lo zawng ngawr ngawra department ho hmalakna enpui an ni loa, an hnathawh hrang hrang leh an harsatna tawh inhriatsaknan leh chak zawka an thawhho theihnan hetiang hun hi buatsaih an ni tih a sawi.
PWD minister Vanlalhlana leh PWD official-te bakah an hnathawh nena inkaihhnawihna nei department – Environment Forest & Climate Change minister Lalthansanga leh official-te, Land Revenue & Settlement minister B Lalchhanzova leh official-te, Law department aiawhten an telpui a. PWD hnuaia contractor thenkhat koh tel an ni bawk.
PWD hian SASCI project 126, PMGSY hnuaiah project 53, NEC/ NESIDS hnuaiah project 29, NEPD/SEDP hmangin project 9, NABARD hnuaiah project 51, CSS project 8 CRF/ SCA hnuaiah project 10, MoRT&H hnuaiah project 15, bridge work 21, mixed head hnuaiah project 10 leh sanction head 5054 (road & bridge) hnuaiah project 192 an thawk mek a. Heng hna an thawh mek zinga harsatna an tawhna project ho sawiin, a chinfel dan tur ngaihtuah ho a ni.
Chief minister hian kartin department pakhat tal review meeting neihpui ziah turin ruahmanna a siam a. Tun hi a buatsaih tum hnihna niin, kar hmasa khan Horticulture, PHE leh RD chu an department changtu minister Prof Lalnilawma hoin a lo neihpui tawh.
PWD hnathawh thlirlet pui
