PWD minister-in kawng a en

PWD minister-in kawng a en
PWD minister Vanlalhlana chuan Mizoram hmar lam tlangdunga khawkar kawng hrang hrang a tlawhkual a, kumin fur ruahtui tla nasain a tihchhiat Khawruhlian khaw hnuaia National Highway-02 kawng, thawmthat mek pawh a hmunah a enfiah.
Khawruhlian bula NH-02 kawngpui hi kumin July leh September khan metre 50 vela zauin hmun hnihah, lirthei kaltlang theih lohin a tlabal a, PWD-in chak taka hma lain tunah hian temporary-in thawmthat mek a ni a, lirthei pawh a tlantlang leh thei tawh. Special repair estimate cheng vaibelchhe 2.65 chu September 9 khan Ministry of Road Transport & Highways-ah thawn a ni tawh bawk.
Minister hian kumin October 21-23 a Sakawrdaia YMA General Conference neihna tura inbuatsaihna ni pahfawm leh mipui tan zin veivahna nuam leh him zawk a awm theihnan Mizoram hmarlam tlangdung kawng hrang hrang, Sakawrdai thlengin a tlawh a. Mauchar, Serkhan leh Bagha inkar kawng bakah Sihphir leh Durtlang inkar kawng pawh a tlawh a, PWD hotuten an tawiawm.