- Congress Thalai
PWD minister-in mawhphurhna hre lo
- Congress Thalai
Fur ruahtui tlak hunah Vairengte atanga Sairang kawnga harsatna awm thei laka inveng tura vawi tam an ngenna chu PWD minister-in a mutthluk san hnu ah, an mawhphurhna ni lo anga a sawi zui avangin a chan hi midang kutah hlan mai se Mizoram-in a thatpui zawk an ring tih Congress Thalai chuan an sawi.
Congress Thalai president Laltawnliana chuan Mizoram châk lakna kawngpui Vairengte to Aizawl Road via Khamrang – Sairang chu fur ruahtui tlak huna harsatna a awm lohnan hmanhmawh zawka kawng siam hna thawk turin kawng siamtute nen tum thum an inkawm tih a sawi a. Harsatna thleng thei laka an ngenna chu sawrkar leh a changtu PWD minister-in an mutthluk sana an vil that tawk loh vangin tun hi kan thleng ta tih a sawi.
“ZPM sawrkar hian kum 15 daih kawng siam turin an inzuar a, an sawrkar hnuah thal vawihnih rei tawk a thlen hnu pawha an ngaihsak tawk loh avanga mipui tawrhna hi thleng a ni. Lirtheia eizawngtute leh he kawngpuiin a paltlang khuate mangang tlawmngaia kawng siam hnatlang an nei fo pawh zak miah loa PWD minister-in, kawng chhia hi mipuiin ka tihchhiat emaw an ti, tia ZPM office-a fiamthu zawnga a la zui hi a thlangtu mipui palzutna a ni,” a ti.
ZPM sawrkarin kawng chhe siam chu sawi loh, kawng tha sa pawh an tichhia tih Laltawnliana hian sawiin, Mizoram kawng khawi lai pawh zawh hleihtheih loh khawpa chhia, lirthei tlu leh tang, damlo zin veivak leh nitin hnathawktute harsatna a thleng nasa tih a sawi.
“Khawiah nge diesel leh petrol atanga September 2024 – March 2025 chhunga ZPM sawrkarin road maintenance atan chhiah Rs. 23,43,01,800 an khawn kha a awm,” tiin a zawt.
PWD minister-in Sairang – Kawnpui kawng Mizoram PWD mawhphurhna a ni lo tih a sawi chu thudik lo a ni, tiin, NH 06 package 8 (Kawnpui – Khamrang) phei chu vawiin thlenga Mizoram PWD enkawl a la ni tih Congress Thalai president hian a sawi.
“PWD minister hian he kawng pawimawh tak chhe lutuk a mawhphurhna ni lo anga a sawi hi thil zahthlak leh mawhphurhna hre miah lo a ni tih a chiang a. Midang kutah PWD hi hlan se Mizoramin kan thatpui zawk ang,” a ti.