PwD tan mipui punkhawm tamna tha tawk lo
Sawrkar laipuiin India rama rualbanlote hamthatna tura a duan pakhat, Sugamya Yatra (Accessible Walk) – Accessible India Campaign pualin Persons with Disabilities commissioner leh National Institute for Locomotor Disabilities (NILD) Aizawl nen tanghoin Sugamya Yatra Audit Team leh rualbanlo thenkhatte chuan mipui punkhawmna building hrang hrang – biak in, sawrkar in, zirna in leh a dangte tlawhin an endik a. Tha tawk lo an hmu nual tih an sawi.
Sawrkar laipui thuchhuah bawhzuiin India ram pumah Sugamaya Yatra hi kum 2015 atang khan kalpui a ni a. Chumi atan chuan rualbanlote pawh awlsam taka an kal zung zung theihna turin building hlui siamrem, (retrofitting) ngai ang ang pawh June 2022 khan zofel vek tawh tura beisei a ni.
Sawrkar laipuiin India ram chhunga he campaign neihna hmun atana khawpui 100 a thlan zingah Mizoram chu a tel ve avangi,he campaign puala building hrang hrang – Aizawl Municipal Corporation, RIPANS, Mizoram State Cancer Institute, Presbyterian Kohhran biak in College Veng, Directorate of Health & Medical Education, Superintendent of Police (Security) Mizoram Police leh Secretariat Main building an tlawh.
Heng building hrang hrangah hian rualbanlote tana thlen phak lohna a tam hle a, inthiarna pawh rualbanlote hman theih loh a la tam hle tih sawi niin, wheelchair hmangte tan a kal theihna ala that tawk loh bakah mitdelte tan awlsam taka kal theihna pawh a la tha tawk lo hle tih sawi a ni.
PwD tan mipui punkhawm tamna tha tawk lo
