Qatar Open-ah Swiatek kal zel
Tournament hnuhnung pahniha champion ve ve world number one Iga Swiatek chuan a zawna a tumthumna’n Qatar Open title hawn leh a tum kal mek a, a tum hlen turin semi-final a thleng leh ta phawt.
Nimin khan Pole Swiatek hian minute 74 lek chhungin Belarusian world number one hlui Victoria Azarenka lakah 6-4 6-0 hnehna a sualchhuak hman a, Doha khaw tournament bika match 11 a chak zawnna chiah niin, final luh inchuh match pakhat zawkah Karolina Pliskova tum lehin, tuntum hian a champion leh thei a nih chuan kum 2013, 2014 leh 2015 daih tawha Miami Open title vawithum la zawn thei Serena Williams hnu lama WTA Tour title a zawna vawithum hawn leh thei hmasaber a ni ang.
Qatar Open quarter-final inkhel dangah grand slam title pali sualchhuak ve tawh Naomi Osaka erawh a chak zo lo thung a, kum hnih dawn chhunga Osaka chak tluan reiber hun hi Czech Pliskova chuan 7-6 (8-6) 7-6 (7-5)-in a danchahsak.
Tarlan tawh thin angin, Japanese Osaka hian nikum July thla khan a fa hmasaber ni turin fanu Shai a hring a, tennis a chawlhsan vang vang hnuah thla hmasa mai khan tennis khelmualah a kirleh a; Doha khawpuia quarter-final a thlen kha April 2022 daih tawha Miami Open final a luh hnua tournament hrim hrima a thlensan leh ber tum a ni.
Semi-final match-a champion lai Swiatek hmachhawn tur Pliskova thung kha Pathianni liamta mai khan Transylvania Open-ah a champion a, kha kha kum li chhunga WTA title a sualchhuah vawikhatna niin, a kal tluan vang lai tak tawngtu Osaka a vanduai ta a ni.
Doha khaw women’s draw dangah kum 2022 Wimbledon champion Elena Rybakina pawhin set hmasabera 4-1-a hniam hman zet chungin Canadian Leylah Fernandez lakah 6-4 6-2 hnehna a chang a, Kazakh third seed hian Danielle Collins laka 7-5 6-4 hnehna changtu Russian nula Anastasia Pavlyuchenkova chu semi-final lehlamah a hmachhawn ang.
Qatar Open-ah Swiatek kal zel
