R-Day-ah India-in a sipai chakna leh a hnam zia pho chhuak

R-Day-ah India-in a sipai chakna leh a hnam zia pho chhuak
Thawhtanni kha India Republic Day vawi 77-na niin a lawmna pui ber, Delhi-a Kartavya Path-a parade-ah sipai chakna leh nunphung leh khawsak dan chi hrang hran pho lan a ni a. National Song ‘Vande Mataram’ kum 150-na puala hun hman a ni bawk.
Republic Day vawi 77-na lawmna hi Prime Minister Narendra Modi-a’n National War Memorial-a zahna pangpar a dah atanga bul tan a ni a. President Droupadi Murmu leh khual lian pahnih, European Council President Antonio Costa leh European Commission President Ursula von der Leyen te chu tih dan thin angin President’s Bodyguard an tih, Indian Army-a regiment hlun bera miten vengin an thuthmun an panpui.
Tih dan thin angin hnam puanzar pawh parh a ni a, national anthem sak zui niin India-in laipui a siam, 105 mm light field gun vawi 21 hmanga chibai bukna hlan a ni a. Laipui vawi 21 hi 172 Field Regiment-a 1721 Ceremonial Battery-in an kah a ni.
Parade-ah hian a vawi khat nan Indian Army-a indo miten van sanga chet lak dan telin indo dan an lantir a, indo thuam famkim nen 61 Cavalry an inlan bawk a. Van lamah India kutchhuak bawk, Dhruv advanced light helicopter hmangin ‘Op Sindoor’ flag leh armed version, Rudra tar lan a ni bawk.
India-in Pakistan-in a puih firfiakte laka sipai chakna hmanga beihpui a thlakna lian ber, Operation Sindoor hi Indian Defence Force-a sipai chi thumten tableau an pho chhuahah pawh tihlan a ni a. Tableau hi state leh sorkar department hrang hrangin an pho chhuak bawk.
Parade hi Lieutenant General Bhavnish Kumar, General Officer Commanding, Delhi second-generation officer-in a kaihruai a. Major General Navraj Dhillon, Chief of the Staff, HQ Delhi, third-generation army officer chu Second-in-Command a ni bawk.
Parade-ah hian sipai chawimawina sang ber ber dawngtute pawh an inlan a. An zingah hian Param Vir Chakra dawngtu pahnih, Subedar Major (Honorary Captain) Yogendra Singh Yadav (retired) leh Subedar Major Sanjay Kumar; Ashoka Chakra dawngtu Major General CA Pithawalia (retired) leh Colonel D Sreeram Kumar te pawh an tel.
Indian van sang lawn mi zinga van thengrenga kai pahnihna, Group Captain Shubhanshu Shukla chu president-in Ashok Chakra a hlan bawk.
European Union (EU) aiawha parade-a telte chu gypsy pathum hmangin flag kengtu pali phurh an ni a. EU flag, European Union Military Staff flag; EU Naval Force Atalanta flag leh EU Naval Force Aspides flag te an keng.
Rashtrapati Bhavan atanga National War Memorial thleng, Kartavya Path-a parade-ah hian India-in zinkawng hrang hrang a zawh tawh hrang hrang pho lan a ni a. Parade khar nan hian national song-in kum 150 a tlin pualin hun hman a ni a. Hetah hian Cultural artist za rualin ‘Vividata Mein Ekta – Unity in Diversity’ tih thupui hmangin an lâm a, rimawi hmangin ram inpumkhatna leh India chu hnam hrang hrang chenna a nihzia an lantir a ni.